Innlent

Steinunn Ýr segir kvenfyrirlitningu grassera innan Samfylkingarinnar

Jakob Bjarnar skrifar
Fyrir liggur að Ágúst Ólafur Ágústsson mun ekki taka sæti á lista Samfylkingarinnar fyrir komandi Alþingiskosningar. Það er umdeilt og inn í það skrifar Steinunn Ýr pistil. Logi Einarsson reynir að lægja öldur innan flokksins.
Fyrir liggur að Ágúst Ólafur Ágústsson mun ekki taka sæti á lista Samfylkingarinnar fyrir komandi Alþingiskosningar. Það er umdeilt og inn í það skrifar Steinunn Ýr pistil. Logi Einarsson reynir að lægja öldur innan flokksins.

Mikil ólga er innan Samfylkingarinnar vegna uppstillingar lista. Logi Einarsson formaður hefur sigið inn í heitar umræður og reynt að lægja öldur.

Steinunn Ýr Einarsdóttir, formaður kvennahreyfingar Samfylkingarinnar, hefur stigið fram á spjallvettvangi Samfylkingarinnar, sem telur á annað þúsund manns, og telur hana eiga óuppgerðar sakir við kynferðisbrotamál sem komið hafa upp innan fylkingarinnar.

Segir óþægilegt að hafa verið með Helga á lista

Steinunn Ýr segir að sér blöskri kvenfyrirlitningin sem hún telur sig greina í Facebookhópnum Samfylkingin - jafnaðarmannaflokkur Íslands. Þó fyrir liggi að Ágúst Ólafur muni ekki taka sæti á lista fyrir komandi kosningar virðist sú niðurstaða umdeild innan flokksins. Þannig skiptist Samfylkingarfólk í tvö horn: Meðan hluti Samfylkingarmanna vilja undirbúa sig fyrir kosningar telur annar hópur nú vert að gera upp við fortíðina.

Steinunn Ýr segir að árið 2016 hafi verið nefnt á þessum vettvangi sem erfitt ár, árið sem hún tók fyrst við sem formaður Kvennahreyfingar Samfylkingarinnar.

„Ég tók einnig þátt í prófkjöri og hafnaði í fjórða sæti á lista. Þegar ég var nýbúin að taka við embættinu og samþykkja sæti á lista fæ ég fyrst fréttir af því að Helgi Hjörvar sem var á sama lista og ég hefði verið ásakaður um alvarlega kynferðislega áreitni.“

Steinunn Ýr segist varla geta lýst því hversu óþægilegt hafi verið að vita af því og geta ekkert gert: „Hann neitaði að víkja.“

Að neðan má sjá link á umfjöllun Stundarinnar frá 2018. Jóhann Páll Jóhannsson, þáverandi blaðamaður en núverandi frambjóðandi Samfylkingarinnar til Alþingis í Reykjavík, fjallaði um málið. 

Jón Baldvin hluti af sögu Samfylkingarinnar

Steinunn Ýr vill meina að sú umræða sem nú geysi innan flokks eigi sér langa sögu, rætur kynferðislegrar áreitni liggi dýpra. 

„Fyrir stuttu stigu fram undir nafni enn fleiri konur sem segja sögu sína af því hvernig Jón Baldvin áreitti þær kynferðislega.“ 

Hann hafi vissulega ekki setið á þingi fyrir Samfylkinguna en sé engu að síður hluti sögu hennar.

Hún segir allt þetta þungbært og sárt en samhengið skipti máli. 

„ÁÓÁ-málið er erfitt og sárt, en vonandi getum við einhvern tímann litið til baka og upplifað það sem lið í uppgjöri sem varð að fara fram. Mér er ljóst að við breytum ekki fortíðinni en stöndum frammi fyrir því að geta nú tekið afstöðu með þolendum.“

Enn óvíst hverjir leiða í Reykjavík

Frásögn Steinunnar kemur beint inn í afar erfiða umræðu sem nú geysar innan vébanda Samfylkingarinnar en verulega umdeilt er að Ágúst Ólafur hafi ekki hlotið náð fyrir augum uppstillinganefndar eins og Vísir hefur fjallað skilmerkilega um.

Von hefur verið á því frá uppstillinganefnd hvernig muni raðast í efstu sæti í Reykjavíkurkjördæmunum en það dregst enn. Að sögn Harðar Oddfríðarsonar formanns uppstillinganefndar mun það ekki vera gefið út fyrir en eftir helgi í fyrsta lagi. 

Þau sem einkum hafa verið nefnd til sögunnar í því samhengi eru þingkonurnar Helga Vala Helgadóttir og Rósa Björk Brynjólfsdóttir (sem nú liggur fyrir að fer fram í Kraganum), Kristrún Frostadóttir hagfræðingur, Ragna Sigurðardóttir formaður Ungra jafnaðarmanna auk Jóhanns Páls Jóhannssonar blaðamanns. 

Þá hefur Vísir heyrt nafn Viðars Eggertssonar leikhúsmanns nefnt sem líklegt ofarlega á lista.

Logi reynir að lægja öldur

En þó nú liggi fyrir að Ágúst Ólafur sé á förum logar allt stafna á milli innan Samfylkingarinnar, eins og ráða má af frásögn Steinunnar Ýrar. Því hefur formaðurinn Logi Einarsson séð sig knúinn til að hvetja fólk til stillingar. Hann ritar pistil á umræddan spjallvettvang. Hann segir að það geti verið flókið að starfa í svo fjölmennum flokki eins og Samfylkingin er.

„Við stefnum í sömu átt en greinir oft á um leiðina, göngulagið og göngutaktinn. Og hverjir skuli leiða ferðina.“ Þannig hefst pistill Loga. 

Hann segir jafnframt: „En stundum falla því miður orð sem betur hefðu verið ósögð.“ 

Hann rekur að það sé ekki öfundsvert að sitja í uppstillinganefnd en engin ástæða sé til að draga heilindi í efa; nauðsynlegt sé að þau fái vinnufrið. Logi lýkur pistli sínum á orðunum:

„Munum svo að orð eru dýr og reynum að vera góð hvert við annað, þó við séum stundum ósammála hvert öðru.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.