Körfubolti

Mestar breytingar hjá Njarðvík og Haukum og nýr þjálfari á Akureyri

Ingvi Þór Sæmundsson skrifar
Valur og Stjarnan þykja hvað líklegust til afreka í Domino's deild karla. Þau mættust í 1. umferð deildarinnar í byrjun október þar sem Stjörnumenn unnu fimm stiga sigur, 86-91.
Valur og Stjarnan þykja hvað líklegust til afreka í Domino's deild karla. Þau mættust í 1. umferð deildarinnar í byrjun október þar sem Stjörnumenn unnu fimm stiga sigur, 86-91. vísir/vilhelm

Keppni í Domino's deild karla hefst á ný í kvöld, 101 dag eftir að síðasti leikurinn í deildinni fór fram.

Ekki hefur verið keppt í Domino's deildinni síðan Keflavík vann Þór á Akureyri, 74-94, 6. október á síðasta ári. Skömmu síðar tók æfinga- og keppnisbann vegna kórónuveirunnar gildi.

Leikmenn fengu grænt ljós á að æfa saman í hópum í desember og í síðustu viku var tilkynnt að keppnisbanni yrði aflétt 13. janúar. Fjórir leikir fóru fram í Domino's deild kvenna í gær. Karladeildin hefst svo í dag með fjórum leikjum. Annarri umferð Domino's deildar karla lýkur svo með tveimur leikjum annað kvöld. 

Fjórir af sex leikjum í 2. umferðinni verða sýndir beint á Stöð 2 Sport. Domino's tilþrifin verða á dagskrá klukkan 22:10 í kvöld og Domino's Körfuboltakvöld klukkan 22:00 annað kvöld.

Leikirnir í 2. umferð Domino's deildar karla

Fimmtudagur 14. janúar

  • Kl. 18:15 Stjarnan - Höttur, sýndur á Stöð 2 Sport
  • Kl. 19:15 KR - Tindastóll
  • Kl. 19:15 Njarðvík - Haukar
  • Kl. 20:15 ÍR - Valur, sýndur á Stöð 2 Sport


Föstudagur 15. janúar

  • Kl. 18:15 Grindavík - Þór Ak., sýndur á Stöð 2 Sport
  • Kl. 20:15 Keflavík - Þór Þ., sýndur á Stöð 2 Sport

Nokkrar breytingar hafa orðið á leikmannahópum liðanna á þeim rúmu þremur mánuðum síðan síðast var keppt í Domino's deild karla. 

Þá skipti Þór Ak. um þjálfara. Andy Johnston var látinn fara og við starfi hans tók Bjarki Ármann Oddsson. Hann stýrir Þórsurum í fyrsta sinn þegar þeir sækja Grindvíkinga heim annað kvöld. Bjarka bíður erfitt verkefni en Þórsurum var spáð falli úr Domino's deildinni.

Bjarki Ármann Oddsson er nýr þjálfari Þórs á Akureyri.

Mestar breytingar hafa orðið hjá Njarðvík og Haukum. Zvonko Buljan og Ryan Montgomery eru horfnir á braut hjá Njarðvík og þá fór Jón Arnór Sverrisson til Breiðabliks í 1. deildinni.

Njarðvíkingar sóttu hins vegar Antonio Hester sem þekkir vel til hér á landi eftir tíma sinn hjá Tindastóli. Hester varð bikarmeistari með Stólunum 2018 og fór með liðinu í úrslit um Íslandsmeistaratitilinn. Á seinna tímabili sínu með Tindastóli var Hester með 20,3 stig og 8,6 fráköst að meðaltali í leik.

Kári Jónsson er farinn frá Haukum.vísir/bára

Haukar misstu ansi stóran spón úr aski sínum þegar Kári Jónsson samdi við Girona á Spáni. Í staðinn fengu þeir Grindvíkinginn Ingva Þór Guðmundsson frá Þýskalandi. Haukar sóttu einnig tvo erlenda leikmenn, Brian Fitzpatrick og Earvin Morris, en misstu einn, Shane Osayande.

Grindavík varð fyrir mikilli blóðtöku þegar landsliðsmaðurinn Sigtryggur Arnar Björnsson samdi við Real Canoe á Spáni. Grindvíkingar ætla að fá leikmann í hans stað en hafa ekki enn fundið hann.

Íslandsmeistarar KR hafa fengið stigakóng sænsku úrvalsdeildarinnar á síðasta tímabili, Ty Sabin, og Robert Stumbris og Ante Gospic eru farnir eftir að hafa aðeins spilað einn leik með Vesturbæjarliðinu.

Valur hnyklaði vöðvana á félagaskiptamarkaðnum í sumar með því að ná í KR-ingana Jón Arnór Stefánsson og Kristófer Acox og að sjálfsögðu þjálfarann Finn Frey Stefánsson. Valsmenn hafa nú bætt við sig portúgölskum leikstjórnanda, Miguel Cardoso, og verða ekki árennilegir þegar keppni hefst á ný.

Stefnt er að því að klára allar umferðirnar sem eftir eru í Domino's deild karla en KKÍ hefur gefið sér frest út apríl til að klára hana. Eftir það tekur bikarkeppnin við og svo úrslitakeppnin.

Leikið verður afar þétt á næstu vikum og ef allt gengur eftir verður aðeins um fjögurra vikna lenging á tímabilinu frá því sem venjulegt er.

Breytingar á liðunum í Domino's deild karla

Miðað við stöðuna í deildinni eftir 1. umferðina

1. Keflavík

Engar breytingar

2. Njarðvík

Inn: Antonio Hester

Út: Zvonko Buljan, Ryan Montgomery, Jón Arnór Sverrisson

3. Þór Þ.

Engar breytingar

4. Grindavík

Inn:

Út: Sigtryggur Arnar Björnsson

5. Stjarnan

Inn:

Út: Roderick Williams

6. ÍR

Inn: Ólafur Björn Gunnlaugsson

Út: Nenad Delic

7. Tindastóll

Engar breytingar

8. Valur

Inn: Miguel Cardoso

Út:

9. Höttur

Inn: Michael Mallory

Út: Shavar Newkirk

10. Haukar

Inn: Ingvi Þór Guðmundsson, Brian Fitzpatrick, Earvin Morris

Út: Kári Jónsson, Shane Osayande

11. KR

Inn: Ty Sabin

Út: Ante Gospic, Roberts Stumbris

12. Þór Ak.

Inn: Andrius Globys

Út:

Listinn er byggður á komnir/farnir grein á Karfan.is.


Domino's-deildirnar í körfubolta eru á Stöð 2 Sport en upplýsingar um útsendingar má finna hér. Domino's-deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.