Segir Ís­lendinga á Bret­lands­eyjum sýna hertum að­gerðum skilning

 Í samtali við Sky news sagði Michael Gove, ráðherra, að staðan yrði metin að nýju 15. febrúar og sagðist eiga von á að í mars gætu yfirvöld aflétt ströngustu aðgerðunum.

Bretar mega einungis hætta sér út fyrir hússins dyr í undantekningartilfellum eins til þess að kaupa matvöru, fara til læknis og í sýnatöku vegna veirunnar. Fólki er þó heimild að stunda líkamsrækt utandyra einu sinni á dag en ekki er leyfilegt að fara út fyrir hverfi viðkomandi.

Aðgerðirnar komu Sturlu Sigurjónssyni, sendiherra Íslands í Lundúnum, ekki á óvart.

„Þetta átti sér náttúrulega aðdraganda þannig að þetta kom nú ekki alveg á óvart. Fjölmiðlar höfðu fjallað um að þetta væri í aðsigi.“

Í gær greindist metfjöldi með kórónuveiruna í Bretlandi, eða hátt í sextíu þúsund manns. Um var að ræða sjöunda daginn sem tilfellin voru yfir fimmtíu þúsund. Nýja afbrigði kórónuveirunnar þungt í þessari miklu fjölgun smita því hún er talin vera fimmtíu til sjötíu prósent meira smitandi en önnur afbrigði veirunnar. Síðastliðnar vikur hefur dauðsföllum, innlögnum og tilfellum fjölgað ört.

„Boris Johnson forsætisráðherra tilkynnti að í þessu ávarpi í gærkvöldi að stjórnvöld væru tilneydd til þess að grípa til hertra ráðstafana og landið fært upp á hæsta viðbúnaðarstig.“

Sturla telur að Íslendingar sem hafa dvalið í Bretlandi til lengri tíma séu orðnir „sjálfbjarga“ eins og hann orðar það og vanir því að þurfa að breyta lífsstíl sínum með stuttum fyrirvara vegna aðgerða. Ekki hafi margir Íslendingar haft samband við sendiráðið eftir að nýju aðgerðirnar tóku gildi.

„Það má segja að þetta sé í þriðja skiptið sem gripið er til svona harðra ráðstafana á undanförnum tíu mánuðum. Það var náttúrulega í mars og inn í apríl, svo síðla haust og svo aftur núna. Þessum hertu ráðstöfunum var aflétt hér í London var aflétt í byrjun desember að mestu leyti en síðan settar aftur á seinna í mánuðinum þannig að þetta hefur sett svip á borgina, óneitanlega.“

Hefur þetta fengið þungt á þá Íslendinga sem þú hefur rætt við?

„Nei, við höfum ekki orðið mikið vör við vandræði eða óánægju hérna, ég held að þeir eins og Bretar átti sig á því að það er gripið til þessara ráðstafana að gefnu tilefni og það er stefnt að því að þær verði eins skammvinnar og mögulegt er og þá horfa menn ekki síst til bólusetninga.“

Ekki hafi margir þurft að leita aðstoðar eða leiðsagnar hjá sendiráðinu.

„En við hvetjum auðvitað Íslendinga til að fylgjast vel með framvindu þessara mála og svo náttúrulega að fylgja fyrirmælum stjórnvalda í einu og öllu. Við höfum reyndar orðið svolítið vör við að Íslendingar á leið til annarra ríkja í gegnum Bretland, til dæmis Spánar, hafi lent í vandræðum vegna takmarkana á flugi frá Bretlandi og í því samhengi þá hvetjum við fólk líka til að kynna sér vel allar opinberar upplýsingar um takmarkanir áður en flug eru bókuð og áður en lagt er af stað því reynslan sýnir að reglur geta breyst með mjög skömmum fyrirvara. Almennt tekur fólk þessu hér með jafnaðargeði og skoðanakannanir benda til þess að það sé mikill meirihluti sem styðji þessar hertu aðgerðir.“