Heimir Óli búinn að semja við GUIF

Haukamaðurinn Heimir Óli Heimisson er búinn að skrifa undir tveggja ára samning við sænska félagið GUIF Eskilstuna sem Kristján Andrésson þjálfar.

Það hefur stefnt í þessa átt nokkuð lengi og nú er loks búið að ganga frá samningum.

"Þetta er efnilegur strákur sem við höfum fylgst vandlega með í nokkur ár," sagði Kristján þjálfari á heimasíðu GUIF um línumanninn efnilega.

"Heimir styrkir hópinn mikið enda sterkur leikmaður á báðum endum vallarins. Það verður gaman að sjá hvaða áhrif hann mun hafa á liðið."

Haukar hafa þegar samið við línumanninn Jón Þorbjörn Jóhannsson sem mun fylla skarð Heimis Óla.