Steinunn: Við erum særðar og reiðar

Einn af stórleikjum vetrarins í Olís-deild kvenna fer fram á morgun þegar langbestu lið landsins - Valur og Fram - mætast. Fram er með þriggja stiga forskot á Valskonur sem verða að vinna leikinn. Annars er deildarmeistaratitillinn Fram-kvenna.

„Við höfum beðið lengi eftir þessum leik og erum spenntar. Við teljum að á morgun muni ráðast hvort við ætlum okkur eitthvað í deildinni,“ segir Steinunn Björnsdóttir, leikmaður Fram, en Fram-liðið hefur aldrei náð að vinna deildina undir stjórn Stefáns Arnarssonar. Valur vann alla titlana í fyrra og það fór illa í Fram-liðið.

„Við höfum spilað vel og unnið sannfærandi. Við erum særðar og reiðar frá síðasta tímabili. Við ætlum okkur stóra hluti. Það er mikið hungur hjá okkur.“

Það er engu logið um það að Fram-liðið sé reitt og það hefur tekið reiði sína út á andstæðingum sínum í allan vetur. Þær hafa verið vægðarlausar og keyrt andstæðinga sína í kaf.

„Það er frábær liðsheild hjá okkur og forréttindi að spila með sínum bestu vinkonum. Það er gaman að fara á æfingar með þeim.“

Díana Dögg Magnúsdóttir, leikmaður Vals, fór mikinn í liði Vals síðasta vetur og hún reiknar með alvöru leik á morgun.

„Okkur hlakkar til og verður gaman að sjá hvar við stöndum á móti þeim. Þetta verður vonandi hörkuleikur þar sem við sýnum hvað í okkur býr. Þetta hefur verið of sveiflukennt í vetur og við ætlum að laga það,“ segir Díana Dögg.

„Vörnin hefur ekki verið eins góð og í fyrra en hún er að koma hjá okkur. Það er gott er styttist í stóru leikina.“

Leikur liðanna hefst klukkan 17.00 á morgun og verður í beinni útsendingu á Stöð 2 Sport.