Eigandinn í Keilufelli kveðst ánægður með leigjendur

Hlynur Jensson, fiskitæknir og eigandi húsnæðisins að Keilufelli, þar sem ráðist var á fjölda Pólverja í gær segir íbúa hússins vera mjög góða leigjendur. Þeir standi alltaf í skilum og aldrei sé neitt vesen á þeim. Hann segist ekki hafa hugmynd um ástæður líkamsárásarinnar, en vill að öðru leyti ekki tjá sig um málið.

Eins og greint var frá í fréttum Stöðvar 2 réðust tíu til tólf pólskir karlmenn inn í hús við Keilufell í síðdegis í gær vopnaðir kylfum, exi, slaghömrum og járnröri. Í húsinu voru sjö pólskir karlmenn sem leigja þar saman. Íbúarnir náðu að hringja á lögreglu og gáfu henni upp bílnúmerið á öðrum bílnum sem árásarmennirnir voru á. Þegar lögregla mætti á staðinn reyndust allir íbúarnir særðir með skurði á höfðum eftir exina, einn var handleggsbrotinn og með áverka í andliti og höndum.

Vísir hefur rætt við nágranna íbúanna sem ráðist var á í gær, en þeir vilja ekki koma fram undir nafni. Af lýsingum að dæma virðast íbúar í götunni hafa orðið fyrir töluverðu ónæði frá íbúum hússins að undanförnu og jafnan sé mikil umferð til og frá húsinu. Að öðru leyti sé Keilufellið mjög friðsæl gata.