Furðar sig á kæru Vodafone

Sævar Freyr Þráinsson, forstjóri Símans, furðar sig á kæru Vodafone sem hefur stefnt Símanum og Fjarskiptasjóði ríkisins vegna sex hundruð milljóna króna samnings um háhraðanettengingar. Vodafone telur að samningurinn feli í sér ólögmæta ríkisaðstoð við Símann og krefst þess að hann verði dæmdur ólögmætur. Sævar sagði í samtali við fréttastofu að hann teldi að eðlilega hafi verið staðið að útboðinu.

Fjarskiptasjóður óskaði fyrir hönd ríkisins eftir tilboðum frá aðilum sem vildu veita háhraðanetþjónustu í dreifðum byggðum landsins árið 2008. Síminn bauð lægsta tilboðið, upp á 378 milljónir króna. Ári síðar, þegar samningurinn var undirritaður var upplýst að samningurinn hljóðaði upp á 606 milljónir. Vodafone telur að samningurinn feli í sér verulegar ívilnanir af almannafé fyrir einn aðila á fjarskiptamarkaði og raski samkeppni.