Uppsveifla hjá McDonald´s

Sala á vörum frá McDonald´s skyndibitakeðjunni hefur aukist sextán mánuði í röð þrátt fyrir mikla umfjöllun um skaðsemi matarins í kjölfar heimildarmyndarinnar "Super Size Me." Forsvarsmenn félagsins telja að ástæða velgengninnar sé meðal annars sú að vel hafi gengið að selja nýjungar á matseðlinum. Keðjan hefur brugðist við ásökunum um að á matseðlinum sé tóm óhollusta og hefur minnkað skammta og bætt við fleiri hollusturéttum. Nokkrar nýjar tegundir hamborgara hafa reynst vel á síðustu misserum en venjan er sú að prófa viðbrögð markaðarins við nýjungum áður en þær eru settar á matseðilinn í öllum útibúum keðjunnar.