Skuldatryggingaálag rikissjóðs stöðugt í 380 punktum

Þetta kemur fram í Moergunkorni greiningar Íslandsbanka. Þar segir að lægst hafi skuldatryggingaálag ríkissjóðs farið niður í 338 punkta frá því að bankahrunið skall á og var það einmitt í nóvemberbyrjun í fyrra.

Ekki er úr vegi að ætla að þessa þróun á áhættuálaginu á ríkissjóð megi rekja til tilkynningar síðastliðinn föstudag frá Alþjóðagjaldeyrissjóðnum (AGS) um að önnur endurskoðun efnahagsáætlunar Íslands væri loksins komin á dagskrá hjá framkvæmdastjórn AGS enda er ekki hægt að rekja hana til almennrar þróunar. Þannig hefur bæði áhættuálagið á mörgum öðrum ríkjum verið að hækka á sama tíma, sem og sveiflast meira. Má hér nefna áhættuálagið á Grikkland sem og einnig á öðrum evruríkjum sem glíma við mikinn halla á opinberum fjármálum.

Þannig hefur skuldatryggingaálagið á Grikkland hækkað úr 364 punktum í 437 punkta frá því í byrjun vikunnar, eða sem nemur um 73 punktum. Álagið á Grikkland er enn mun hærra en áhættuálagið á Ísland, en það gerðist í fyrsta sinn í síðustu viku. Verulegt flökt hefur einkennt skuldatryggingaálag gríska ríkisins að undanförnu enda hafa fá ríki fengið jafn mikla umfjöllun, og þá neikvæða, um stöðu efnahagsmála en einmitt hið gríska.