Lánasjóðssvikarar: Peð í íslenskri mafíu

Grunur leikur á að fjórir ungir fjársvikarar, sem nú sitja í gæsluvarðhaldi, hafi tekið svikin að sér til að fjármagna skipulagða glæpastarfsemi sér eldri manna sem fengu þá til verksins. Þeir hafi verið viðbúnir því að taka skellinn fyrir brotin og sitja inni. Féð, nokkrir tugir milljóna, er enn ófundið og er alls óvíst hvort það finnst nokkurn tíma.

Svik mannanna voru afar flókin, og er það samdóma álit heimildarmanna blaðsins að menn um og undir tvítugu geti tæpast hafa átt frumkvæðið að þeim. Rannsókn lögreglu hefur meðal annars beinst að því hverjir kunni að standa á bak við þá.

Piltarnir tóku yfir stjórn tveggja fyrirtækja með því að falsa tilkynningar til fyrirtækjaskrár um breytingar á stjórnum og breytta prókúruhafa. Síðan stungu þeir undan fé í eigu félaganna.

Þá fölsuðu þeir kaupsamninga að fasteignum í eigu félaganna, létu þinglýsa þeim hjá sýslumanni og tóku tugmilljóna lán fyrir kaupunum hjá Íbúðalánasjóði, sem þeir stungu einnig undan. Svikin nema minnst fimmtíu milljónum, og er talan enn talin geta hækkað.

Tveir mannanna voru handteknir þegar þeir reyndu að leika sama leik með þriðja félagið en voru gómaðir. Hinir tveir voru handteknir í vikunni við komuna frá Malaga á Spáni. Fjórmenningarnir sitja í einangrun fram í næstu viku hið minnsta. Frekari handtökur eru ekki útilokaðar.

Heimildarmenn blaðsins segja athyglisvert að svikin eru þess eðlis að nær útilokað hefði verið fyrir mennina að komast upp með þau án þess að nást. Þeir hafi ekki haft sérstaklega fyrir því að hylja slóð sína, bættu til dæmis sjálfum sér á lista yfir stjórnarmenn félaganna og færðu hið svikna fé í fyrstu á eigin reikninga. Ómögulegt hefði verið fyrir raunverulega forsvarsmenn félaganna að yfirsjást svikin. Þá hafa sumir þeirra þegar játað brotin að hluta.

Því er talið að mennirnir ungu hafi vitandi vits tekið skellinn fyrir raunverulega höfuðpaura í málinu, en ekki fyrr en þeim tókst að koma fénu undan. Málið þykir til marks um þrepaskipt kerfi í glæpaheiminum, þar sem menn ávinna sér virðingu með því að vinna skítverk möglunarlaust.