Playboy viðtal veldur vanda

Enn virðist hlaupin ný snurða á þráðinn hjá netfyrirtækinu Google en hlutafjárútboð þess á bandarískum markaði hófst í gær. Félagið sat undir ámæli fyrir að hafa sniðgengið skráningarreglur vegna hlutafjáreignar starfsmanna fyrir skemmstu. Það sem nú veldur áhyggjum er viðtal karlatímaritsins Playboy við stofnendur Google. Samkvæmt reglum um skráð félög mega stjórnendur ekki tjá sig opinberlega í tiltekinn tíma áður en útboð hefst. Sérfræðingar telja að þótt innihald viðtalsins feli ekki í sér neinar upplýsingar kunni yfirvöld að líta rofið á þagnarbindindi stjórnendanna óblíðum augum. Í viðtalinu ræða stofnendurnir fyrst og fremst um hversu stoltir þeir séu af því að hafa skapað vöru sem velflestir internetnotendur nýti sér til gagns á hverjum degi. Forsvarsmenn Google halda því fram að þótt viðtalið sé birt nú hafi það verið tekið í lok apríl, áður en endanleg gögn voru send fjármálaeftirlitinu.