Auroracoin hríðfellur í verði

Hin nýja rafmynt Auroracoin, sem er nú verið að dreifa til allra Íslendinga sem vilja, hefur hríðfallið í verði frá því að dreifingin hófst. Verðþróun gjaldmiðilsins borið saman við bandaríkjadal má sjá á meðfylgjandi mynd neðst í fréttinni og hér. Heildar markaðsvirði Auroracoin hefur fallið mikið og er nú rétt rúmlega þrír milljarðar og þrjú hundruð milljónir króna en það var sex milljarðar króna í gær.

„Margir Íslendingar hafa ákveðið að selja aurana sína fyrir bitcoin eða aðra gjaldmiðla. Á sama tíma eru einhverjir úti í heimi að kaupa þessa aura, og veðja á að verðið hækki. Það var alveg ljóst frá byrjun að einhver hluti fólks myndi selja aurana sína strax og það kynni að hafa þessi áhrif,“segir Baldur Friggjar Óðinsson, sem er dulnefni fyrir þann hóp eða einstakling sem stendur fyrir Auroracoin.

Þó segir Baldur að með tímanum muni stöðugleiki nást.

„Með tímanum mun myndast stöðugra verð á gjaldmiðilinn, eftir því sem fleiri skipta með hann. Það er ómögulegt að segja hvar það verð ber niður. Framtíðin verður að leiða það í ljós.“

Erfitt er að segja til um ástæðu gengishrunsins og eru ýmsar kenningar á lofti. Á spjallborðum og netsamfélögum þar sem áhugamenn um netgjaldmiðla koma saman er fólk hvatt til að hætta viðskiptum með Auroracoin og losa sig við aurinn.

Aðstandendur verkefnisins fullyrða að verkefnaáætlun fyrir Auroracoin sé enn í gildi, allt hafi farið eftir áætlun og að hér sé fyrst og fremst um ræða nettröll. Því ætti að taka öllu sem fullyrt er um gengishrun Auroracoin með hæfilegum fyrirvara, eins og huldumaðurinn Baldur Friggjar Óðinsson orðar það.

Hann hefur einnig ítrekað bent á að gengi Auroracoin hafi á síðustu mánuðum hækkað gríðarlega vegna spákaupmennsku og því hafi verið viðbúið að gengi AURsins myndi jafnast út með einhverjum hætti.

Smári McCarthy, forritari, segir ansi athyglisverða þróun hafa átt sér stað í nótt. Aðstandendur verkefnisins hafi innleitt nýja peningastefnu í kóðun Auroracoin, þetta útskýri þó ekki gengishrunið sem slíkt. Þessi nýja stefna breytti reglum um hvernig AUR er deilt út.

Nú hafa rúmlega 6,5 prósent Íslendinga sótt sinn skammt og eru að opnast möguleikar fyrir fólk að nota AURinn.