Lögreglan rannsakar spillingu hjá Birmingham

Lögreglan í Englandi gerði í dag húsleit í höfuðstöðvum enska úrvalsdeildarfélagsins Birmingham vegna gruns um spillingu.

Eftir því sem talsmaður félagsins sagði tengist rannsóknin ekki þeirri sem Stevens lávarður stýrði í tengslum við mútuþægni og annars konar spillingu í tengslum við félagaskipti leikmanna.

Lögreglan sagði þó að þetta tengdist áframhaldandi rannsókn yfirvalda á spillingu í fótboltaheiminum.

Enginn starfsmaður félagsins hefur verið yfirheyrður eða handtekinn vegna þessa.