Meirihluti vill synjunarvaldið áfram hjá forseta

Stefán Ó. Jónsson skrifar 1. nóvember 2015 11:30

Stefán Jón Hafstein, sem nú starfar hjá Þróunarsamvinnustofnun Íslands, er enn þeirra sem hefur verið nefndur sem kandídat í forsetaframboð, og hann virðist heitur, volgur í það minnsta.

Sjö- af hverjum tíu Íslendingum vilja hafa synjunarvald á lögum hjá forseta Íslands að óbreyttu og þá telur sama hlutfall landsmanna óskýrt hvenær og hvers vegna forseti beitir þessu sama valdi.

Þetta eru meðal þeirra niðurstaðna sem Stefán Jón Hafstein kynnti í Sprengisandi á Bylgjunni nú í morgun en hann hefur á síðustu vikum staðið fyrir könnun á hug fólks til forsetaembættisins.

Stefán stofnaði hóp á Facebook undir heitinu „Hlutverk forseta“ sem umræðuvettvang þar sem fólk geti velt fyrir sér hlutverki forseta Íslands á næsta kjörtímabili áður en forsetakosningarnar yrðu persónugerðar.

Í hópnum eru nú rúmlega 330 Íslendingar og eru þeir lungann af þeim 700 sem svöruðu spurningum Stefáns um forsetaembættið. Hann segir nauðsynlegt að taka niðurstöðunum með þeim fyrirvara að svörin koma frá einstaklingum sem höfðu áhuga á að svara, en ekki slembiúrtaki Íslendinga.

Sjá einnig: Stefán Jón Hafstein horfir til Bessastaða

Svörin gefa til kynna að um 80 prósent aðspurðra telja embættið mjög eða fremur áhrifamikið, þrátt fyrir það hafi í raun fáum formlegum skyldum að gegna og hlutverk þess sé lítið skilgreint.

Átta af hverjum tíu Íslendingum vilja einnig að forseti Íslands beiti synjunarvaldi sínu varlega. Jafnframt vill meirihluti Íslendinga að valdið verði áfram í höndum forsetans en fari svo að gerðar verði stjórnarskrárbreytingar og þjóðinni veitt synjunarvald telur meirihluti að valdið eigi að vera bæði hjá þjóð og forseta.

Hægt er að nálgast skjal með niðurstöðunum í heild á Fésbókarsíðunni „Hlutverk forseta”

Vettvangur til að ræða embættið

Stefán Jón sagðist í samtali við Vísi hafa ákveðið að leggja gott til þó ekki væri meira og taka frumkvæði að því að hafa „umræðuna á okkar forsendum - okkar sem ráðum í raun ferð um forsetakjör. Svo er bara að sjá til hvers það leiðir, en nýir tímar bjóða upp á ný vinnubrögð og nýtt fólk.“

Stefán Jón taldi þannig upplagt að virkja möguleika samfélagsmiðlanna til umræðu. „Hvað viljum við með embættið? Það er spennandi að nýta svona vettvang til lýðræðislegra tilrauna. Nú færum við umræðuna á annan reit en verið hefur að undanförnu, að mínu mati er kominn tími til að breyta... í þessu efni eins og svo mörgu,“ sagði Stefán Jón.