60 íslenskir hönnuðir sameinast í 17-húsinu

Vörur 60 íslenskra hönnuða verða til sölu í ATMO, nýrri verslun í gamla Sautján-húsinu á Laugaveginum. Nokkrum hönnunarverslunum verður samtímis lokað. Rekstur í kjallara í samstarfi við Rauða krossinn. Gló með veitingar í húsinu.

Eftir einn mánuð, eða þann 15. nóvember næstkomandi, færist líf í efri hluta Laugavegarins. Þá verður opnuð verslun í húsnæðinu þar sem verslunin Sautján var áður en það hefur staðið autt í næstum tvö ár.

"Þetta verður stærsta tísku- og hönnunarhús sinnar tegundar því að þarna verða til sölu vörur 60 íslenskra hönnuða," segir Ásta Kristjánsdóttir, framkvæmdastjóri ATMO, sem verður nafn verslunarinnar.

Að mati Ástu var löngu orðið tímabært að koma upp slíkri verslun. "Það er oft þungur rekstur fyrir hönnuð að reka verslun og sjá jafnframt um hönnun og framleiðslu," segir hún.

Spurð að því hvort einhverjum hönnunarverslunum verði lokað vegna opnunar ATMO segir hún svo vera. "Nokkrum sem flytja inn í ATMO verður lokað samtímis, til dæmis Nikita og Munda. Við sjáum svo hvernig þetta þróast. Það eru margir með rekstur á tveimur stöðum."

Ásta segir markmið ATMO vera að auðvelda aðgang að íslenskri hönnun og auka veg hennar og virðingu. "Við erum að byggja upp þennan bransa. Hugmyndir eru uppi um að vera með sérstakt sýningarherbergi, sem á ensku er kallað "show room", fyrir erlenda kaupendur og jafnvel námskeið og ýmislegt sem snýr að hönnun til að styrkja greinina í heild sinni."

Í ATMO verður hægt að kaupa fatnað, skó, snyrtivörur og gjafavörur svo eitthvað sé nefnt, allt hannað af Íslendingum. "Í kjallaranum verður svo skiptimarkaður hönnunarfatnaðar og second hand-fatnaður, gömul húsgögn og gjafavara. Reksturinn þar verður í samstarfi við Rauða krossinn og hagnaðinum verður varið til að styrkja gott málefni," greinir Ásta frá.

Veitingarekstur verður á tveimur stöðum í húsnæðinu, sem er alls þrjú þúsund fermetrar og á þremur hæðum. "Veitingastaðurinn Gló verður með veitingar í ATMO. Okkur finnst það mjög spennandi því að Solla í Gló er heimsmeistari í hráfæði."

Að ATMO standa auk Ástu, sem er stofnandi Eskimo, Reykjavík Fashion Festival og E-Label, nokkrir aðilar sem hafa mikla reynslu af rekstri, markaðssetningu, sölu og framleiðslu á íslenskri hönnun. Meðal þeirra er Bolli Kristinsson, stofnandi Sautján og eigandi húsnæðisins.

ibs@frettabladid.is