Treystir að Al Thani-málið fari sömu leið

Breska efnahagsbrotalögreglan, Serious Fraud Office (SFO), hefur hætt rannsókn á málefnum Kaupþings. Þar með er Sigurður Einarsson, fyrrverandi stjórnarformaður bankans, ekki lengur í sigti hennar. Áður hafði rannsókn á þætti nokkurra annarra fyrrverandi starfsmanna Kaupþings og bræðrunum Vincent og Robert Tchenguiz verið látin niður falla.

„Ég fagna því að þessi niðurstaða sé loksins komin en það sem veldur vonbrigðum er hvað þetta hefur tekið langan tíma," segir Sigurður Einarsson í samtali við Fréttablaðið.

Málið hófst með húsleitum og handtökum í London og á Íslandi í mars í fyrra. 135 tóku þátt í aðgerðunum og níu voru handteknir. Til rannsóknar voru lánveitingar Kaupþings til Tchenguiz-bræðra.

Sigurður segir að þau gögn sem hann hafi séð um rannsóknina og snúi að honum hafi verið „þvílík endemis þvæla og skáldskapur". „Ég tel útilokað annað en að þær upplýsingar hafi að miklu leyti komið frá embætti sérstaks saksóknara á Íslandi," bætir hann við.

Sigurður er einn þeirra sem nú sæta ákæru sérstaks saksóknara fyrir umboðssvik og markaðsmisnotkun í svokölluðu Al Thani-máli. Málið snýst um meint svik og blekkingar þegar katörskum sjeik og Ólafi Ólafssyni voru lánaðir um 30 milljarðar skömmu fyrir bankahrun.

„Þær ávirðingar eru jafninnantómar og þær sem SFO hefur núna látið niður falla," segir Sigurður. „Ég treysti að það sé stutt í að sérstakur saksóknari sjái sóma sinn í því – eins og SFO hefur gert – að falla frá rannsókn sinni."

Í greinargerð Sigurðar vegna Al Thani-málsins, sem lögð var fyrir Héraðsdóm Reykjavíkur fyrr í mánuðinum, segir að „allnokkur mál" séu til rannsóknar hjá sérstökum saksóknara þar sem Sigurður hafi réttarstöðu sakbornings.

Spurður hvort hann eigi von á að þær rannsóknir leiði til ákæru segist Sigurður ekki telja að svo verði. „Ég á ekki von á því, en það er erfitt fyrir mig að tjá mig um það því að ég er ekki búinn að sjá neinar niðurstöður um það hjá saksóknaranum."

stigur@frettabladid.is