Skuldamál gegn Kaupþingstoppum tekið fyrir

Skuldamál Dróma gegn öllum helstu stjórnendum Kaupþings verður tekið fyrir í Héraðsdómi Reykjavíkur í dag.

Drómi hefur höfðað mál á hendur fimm fyrrverandi yfirstjórnendum Kaupþings til innheimtu rúmlega 900 milljóna króna skuldar vegna jarðakaupa við Langá á Mýrum. Jarðirnar voru ætlaðir undir sumarhús sem aldrei risu, eins og fram kom í Fréttablaðinu á dögunum.

Fimmmenningarnir sem um ræðir eru forstjórinn Hreiðar Már Sigurðsson, stjórnarformaðurinn Sigurður Einarsson, Ingólfur Helgason, sem var forstjóri bankans á Íslandi, Magnús Guðmundsson, sem var forstjóri bankans í Lúxemborg, og Steingrímur P. Kárason, sem var yfirmaður áhættustýringar.

Málið er jafnframt höfðað á hendur félaginu Hvítsstöðum ehf., sem skuldin hvílir á, og dótturfélagi þess, Langárfossi ehf. Fimmmenningarnir eiga hver fimmtung í Hvítsstöðum.

Lögmaður fimmmenninganna er Helgi Sigurðsson, en hann er jafnframt fyrrverandi yfirlögfræðingur Kaupþings. Bjarki Baxter flytur málið fyrir Dróma.