Vill að þingmenn ræði stjórnarskrárfrumvarpið

Illugi Gunnarsson, þingflokksformaður Sjálfstæðisflokksins, mun leggja það til á þingflokksformannafundi í dag að fram fari efnisleg umræða um tillögur stjórnlagaráðs á Alþingi fyrir þjóðaratkvæðagreiðsluna.

„Kosningarnar eru núna um næstu helgi. Það er nauðsynlegt að það sé sem mest umræða um efni þessara tillagna. Það hefur lítið farið fyrir efnislegri umræðu," segir Illugi og vill að Alþingi geri sitt til að bæta úr því með því að ræða tillögurnar einhverntíma í vikunni.

„Umræðan væri þá hugsuð til að fólk gæti fylgst með og til að vekja athygli á einstaka greinum í tillögum stjórnlagaráðs og velta upp rökum með og á móti," segir Illugi og telur að vel verði tekið í þessa hugmynd á þingflokksformannafundinum.

„Það verður allt miklu betra ef kostir og gallar frumvarpsins hafa komið fram í umræðunni áður en gengið er til atkvæða," segir Illugi.