Fólskuleg árás í Menntaskólanum á Ísafirði

Nemandi varð fyrir fólskulegri árás í Menntaskólanum á Ísafirði í gær. Málið er til rannsóknar hjá lögreglu sem vill ekkert gefa upp að svo stöddu.

Á fréttavef Bæjarins Besta er fullyrt að það hafi verið samnemendur stráksins hafi gengið í skrokk á honum inni á klósetti í verkmenntadeild skólans. Atvikið ku hafa átt sér stað eftir kennslustund þegar drengirnir læstu viðkomandi inni á klósetti og börðu hann ítrekað með hnúajárnum. Árásarþoli var í kjölfarið fluttur á sjúkrahúsið á Ísafirði til aðhlynningar en ekki er vitað um líðan hans að svo stöddu.

Yfirheyrslur vegna málsins standa nú yfir og lögregla taldi sig ekki geta gefið neinar upplýsingar um málið í bili.