Kjartan segir borgina sóa almannafé

Kjartan Magnússon borgarfulltrúi Sjálfstæðisflokksins gagnrýnir harðlega kaup borgarinnar á BSÍ húsinu og skemmu að Keilugranda 1. Kaupin voru samþykkt á borgarstjórnarfundi í dag. Samkvæmt samningum kaupir borgin 445 milljónir fyrir BSÍ og 240 fyrir Keilugranda 1. Kjarta segir að við það muni bætast tugmilljónakostnaður vegna niðurrifs. „Reykjavíkurborg á báðar lóðirnar en með þessu er hún að greiða hátt yfirverð fyrir tvö gömul hús, sem eru illa farin og jafnvel ónýt," segir Kjartan.

Kjartan bendir á að í tillögunni sé gert ráð fyrir því að BSÍ húsið verði nýtt sem aðalskiptistöð strætisvagna á höfuðborgarsvæðinu. Samt liggi ekkert sérfræðiálit fyrir um að þetta sé besti staðurinn en auk BSÍ hafi Kringlan og Mjóddin verið nefnd. „Við óskuðum eftir frestun málsins þar til slíkt sérfræðiálit liggur fyrir en meðfylgjandi tillaga var felld af meirihlutanum. Þá er óljóst hvernig verður staðið að nýtingu hússins og samstarfi við núverandi leigutaka þess,‟ segir Kjartan.

Kjartan segir að sjálfstæðismenn hafi frekar viljað að borgin leysti lóðina að Keilugranda 1 til sín með lágmarkstilkostnaði og ráðstafað henni síðan til íþróttastarfsemi í Vesturbænum, en að kaupa hana. Þar vanti sárlega viðbótarsvæði í þágu barna- og unglingastarfs. „Allt er þetta mál afar illa og flausturslega unnið og ber vitni um slæma meðferð meirihlutans á almannafé," segir hann.