Hvergi betra fyrir konur að vera á vinnumarkaði en á Íslandi

Hvergi er betra fyrir konur að vera á vinnumarkaði en á Íslandi samkvæmt niðurstöðu mælinga frá breska tímaritinu The Economist. Tímaritið hefur gefið út vísitölu sem mælir tíu mismunandi þætti til þess að komast að því hvar mestar líkur séu á því að konur njóti jafnræðis á vinnumarkaði.

The Economist gefur árlega út svokallaða glerþaksvísitölu þar semþættir á borð við menntunarstig, fjöldi kvenna í stjórnunarstöðum, fyrirkomulag fæðingarorlofs og þáttöku kvenna í stjórnmálum eru mældir. Reiknað er út vegið meðaltal þessara tíu flokka og út kemur stigaskor hvers lands.

Í ár er stigaskor Íslands reiknað með í fyrsta sinn og þýtur Ísland beint í efsta sæti með 80 stig af 100 mögulegum. Noregur, Svíþjóð og Finnland raða sér í sætin á eftir Íslandi. Í umfjöllun The Economist um vísitöluna er tekið fram að ekki komi á óvart að Norðurlöndin raði sér í efstu sætin, þar taki konur þátt á vinnumarkaðinum til jafns við karla og að löng hefð sé fyrir jafnrétti kynjanna.

Neðst á listanum mælast Suður-Kórea, Japan og Tyrkland með 25, 27 og 28 stig af 100 mögulegum. Í þessum ríkjum eru karlmenn líklegri en konur til þess að mennta sig, starfa á vinnumarkaði og vera í stjórnunarstöðum auk þess sem að launamunur kynjanna er umtalsvert meiri en á Norðurlöndunum.

Hvað er glerþak?

Glerþakið er stundum notað sem myndlíking í jafnréttismálum til þess að tala um ósýnilegar hindranir sem heft geta framgang kvenna og minnihlutahópa á vinnumarkaði, óháð frammistöðu eða hæfni. Fræg er t.d. auglýsing VR um útrýmingu kynbundins launamunar þar sem glerþakið kemur fyrir.