Dæmdur fyrir að kúga meintan auðmann "sem hafi hagnast á auðlindum landsins“

36 ára gamall karlmaður hefur verið dæmdur í eins árs fangelsi, þar af níu mánuði skilorðsbundna, fyrir að hafa reynt að kúga 100 milljónir út úr hjónum á Ísafirði.

Í ákæru ríkissaksóknara kemur fram að hinn 36 ára gamli maður hafi hótað því að beita annan mann líkamlegu ofbeldi í því skyni að hafa af honum fé. Maðurinn sem var dæmdur fyrir fjárkúgunina sendi hjónum bréf og í því kom fram að sá dæmdi væri „að safna fé frá auðmönnum sem hafi hagnast á auðlindum landsins, á kostnað Íslendinga“. 

Hinn 36 ára maður neitaði sök.

Bréfið var sent í lok október árið 2012 og átti hinn meinti auðmaður að greiða milljónirnar fyrir 20. nóvember sama ár.  Í bréfinu kom fram hvar og hvenær hinn meinti auðmaður ætti að afhenda peninginn.

Í bréfinu var því einnig haldið fram að fleiri en einn maður stæði að baki bréfsendingunni. Þar kom fram að hópur manna stæði fyrir bréfsendingunni og væru fleiri meintir auðmenn í sigtinu. Sagt var að  hópurinn hefði reynslu af því að hafa fé af fólki sem þeir hefðu valið og að maðurinn væri einn þeirra sem valinn hefði verið. Kom fram að enginn af þeim sem valdir voru af hópnum myndu sleppa og að ofbeldi yrði notað ef þess þyrfti.

Þeir hefðu undanfarið fylgst með manninum og vissu allt um daglegt líf hans og vandamanna hans. Vonuðust mennirnir eftir því að þurfa ekki að beina aðgerðum sínum að vandamönnum mannsins og að ekki kæmi til leiðinda eða átaka vegna þessa.  Velferð allra væri best borgið með því að maðurinn yrði við kröfunni.

Í ákæru segir svo að ákærði hafi fylgt bréfinu og fjárkúguninni eftir með því að senda ógnandi sms-skilaboð í farsíma mannsins.

Allt var þetta að mati ríkissaksóknara til þess fallið að valda hjónunum ótta um líf þeirra og velferð en hjónin leituðu til lögreglu vegna málsins. 

Manninum var gert að greiða hinum meinta auðmanni 800 þúsund í miskabætur auk málskostnaðar upp á þrjú hundruð þúsund.