Þæfingsfærð víða á landinu

Tilkynning frá Vegagerðinni sem segir vegi að mestu auða um sunnanvert landið.

En á Vesturlandi er hálka á Fróðárheiði og Holtavörðuheiði, hálkublettir á Vatnaleið en snjóþekja á Bröttubrekku.

Hálkublettir eru einnig víða í Dalasýslu.

Hálka eða hálkublettir eða snjóþekja er víða á Vestfjörðum. Ófært er á Hrafnseyrarheiði og Dynjandisheiði. Á Ströndum er víða þæfingsfærð eða þungfært.

Á Norðurlandi vestra er hálka, hálkublettir eða snjóþekja á vegum. Hálka er á Vatnsskarði en snjóþekja á Þverárfjalli.

Þæfingsfærð er frá Sauðárkróki í Ketilás og þungfært þaðan og á Siglufjörð, en unnið er að hreinsun. Þæfingsfærð eða þungfært er á útvegum í þessum landshluta.

Á Norðausturlandi er snjóþekja eða hálka á vegum. Enn er þungfært í Ljósavatnsskarði, Reykjahverfi og á Möðrudalsöræfum en þar sem unnið er að hreinsun. Ófært er um Hófaskarð og Hálsa en verið að hreinsa. Þæfingsfærð er á Sandvíkurheiði.

Á Austurlandi er snjóþekja á flestum vegum og verið er að hreinsa allar aðalleiðir. Hálka og skafrenningur er á Fagradal og Oddskarði og snjóþekja og skafrenningur á Fjarðarheiði. Breiðdalsheiði og Öxi eru ófærar.

Vegur er að heita má auður með ströndinni frá Reyðarfirði og suður úr.