Almannavarnir: Hugið að veðrinu

Almannavarnir hvetja íbúa á landinu, sérstaklega á Suður- og Vesturlandi að veita athygli eftirfarandi veðurspá Veðurstofu Íslands:

Varað er við óveðri í nótt og á morgun. Hvessir í kvöld. Suðaustan stormur, 15-23 m/s suðvestanlands með slyddu og síðan rigningu í nótt. Hvassari suðvestantil á landinu (þ.á.m. á norðanverðu Snæfellsnesi), snemma í fyrramálið, mánudagsmorgun, allt að 28 m/s á stöku stað og vindhviður yfir 40 m/s við fjöll. Vindur verður í hámarki frá kl. 6 til kl. 9 eða um það leyti sem fólk heldur til vinnu eða skóla.

Lægir mikið eftir hádegi. Á höfuðborgarsvæðinu má búast við að hvassast verði í efri byggðum Reykjavíkur og Kópavogs, og í Vallahverfinu og Áslandi í Hafnarfirði.

Í öðrum landshlutum á morgun, suðaustan 15-23 og slydda eða og hvassar vindhviður við fjöll. Lægir mikið síðdegis.

Einnig er búist er við mikilli úrkomu á morgun á Suðausturlandi og Austfjörðum.

Fólki er bent á að fylgjast náið með upplýsingum um veður á vefsíðu Veðurstofunnar og færð á vefsíðu Vegagerðarinnar.