Fyrsti lækkunardagur ársins

Úrvalsvísitalan lækkaði í gær í fyrsta skipti á árinu eftir töluverða hækkun það sem af er ári. Lækkun gærdagsins, sem rakin er til snöggrar lækkunar á krónunni, nam 0,7 prósentum og endaði vísitalan í 6.730 stigum.

Veltan nam 8,4 milljörðum króna í töluverðum fjölda viðskipta eða 611.

Nær öll félög lækkuðu í virði. Hlutabréf í Glitni og Landsbankanum lækkuðu um rúmt eitt prósent, Kaupþing og FL um tæpt eitt prósent og Straumur-Burðarás um rúmt hálft prósent.

Bréfa í 365 lækkuðu mest eða um 1,83 prósent.

Eina félagið sem hækkaði í gær var Hf. Eimskipafélagið sem hækkaði um 1,5 prósent.

Frá áramótum nemur heildarvelta með hlutabréf tæpum 179 milljörðum króna. Árshækkun Úrvalsvísitölunnar, sem samanstendur af fimmtán félögum, er um fimm prósent.