Tilnefna Vatnajökulsþjóðgarð á heimsminjaskrá

Hafinn er undirbúningur að því að tilnefna Vatnajökulsþjóðgarð sem næstu tilnefningu Íslands fyrir heimsminjaskrá Menningarmálastofnunar Sameinuðu þjóðanna (UNESCO).

Mikill áhugi hefur verið á því að tilnefna Vatnajökulsþjóðgarð á heimsminjaskrána og miðast undirbúningsvinnan við að skilgreina og afmarka til hvaða náttúrufyrirbæra tilnefningin tæki. Ljóst er að rekbeltið, heiti reiturinn undir landinu og eldstöðvakerfi í gosbeltunum ásamt samspili elds og íss verða viðfangsefni tilnefningarinnar, segir í tilkynningu.

Sigrún Magnúsdóttir, umhverfis- og auðlindaráðherra, hefur í samvinnu við Illuga Gunnarsson, mennta- og menningarmálaráðherra, sett af stað undirbúning vinnu við að skilgreina, afmarka og afla nauðsynlegra gagna og upplýsinga fyrir verkefnið.

Skipuð hefur verið þriggja manna verkefnisstjórn sem í sitja fulltrúar umhverfis- og auðlindaráðuneytisins, mennta- og menningarmálaráðuneytisins og Vatnajökulsþjóðgarðs. Verkefni þeirra fyrst í stað er að hefja vinnu við skilgreiningu og afmörkun tilnefningarinnar og setja niður vinnu- og tímaáætlun. Hópurinn mun kalla til nauðsynlega sérfræðinga og fulltrúa stofnana til þess að skýra og afmarka verkefnið.

Stefnt er að því að verkefnisstjórn skili tillögum til ríkisstjórnarinnar um verkfyrirkomulag og tímaramma í júní og að drög að afmörkun og skilgreiningu tilnefningarinnar verði tilbúin fyrir sumarlok. 

Fréttin birtist fyrst í Fréttablaðinu 3. maí