Viðskipti innlent

Ekkert heyrt frá héraðs­sak­sóknara og snýr aftur strax í fyrra­málið

Eiður Þór Árnason skrifar
Þorsteinn Már Baldvinsson segir næg verkefni fram undan hjá fyrirtækinu.
Þorsteinn Már Baldvinsson segir næg verkefni fram undan hjá fyrirtækinu. Vísur/sigurjón

Í dag tilkynnti stjórn Samherja að Þorsteinn Már Baldvinsson myndi snúa aftur í stól forstjóra við hlið Björgólfs Jóhannssonar sem tók við því hlutverki í nóvember í fyrra.

Að sögn stjórnarformanns er Þorsteinn fenginn aftur til að „leiða aðgerðir Samherja vegna þeirra fáheyrðu aðstæðna sem eru uppi vegna útbreiðslu Covid-19.“

Sjá einnig: Þorsteinn Már snýr aftur í stól forstjóra Samherja

Þorsteinn steig tímabundið til hliðar sem forstjóri Samherja í kjölfar fjölmiðlaumfjöllunar um starfsemi samstæðunnar í Namibíu.

Þá gaf hann út að hann hygðist láta af stjórn á meðan rannsókn norsku lögmannsstofunnar Wilborg Rein á starfsemi Samherja í Namibíu færi fram. Rannsóknin sem var hafin að beiðni Samherja stendur enn yfir.

Segir þetta hafa verið ákvörðun stjórnar

Aðspurður hvers vegna hann taki þá ákvörðun að snúa aftur í forstjórastólinn á þessum tímapunkti segir Þorsteinn um sé að ræða ákvörðun stjórnar Samherja.

„Stjórnin hún óskaði eftir því við mig og ég er að sjálfsögðu bara þakklátur fyrir það traust sem þau sýna mér og að sjálfsögðu bregst ég við því með því að koma til starfa aftur,“ segir Þorsteinn í samtali við Vísi.

Áður talaðir þú um að þú ætlaðir að stíga til hliðar á meðan þessari rannsókn stæði en henni er ekki lokið. Breyttist eitthvað þar?

„Hún er í gangi og mun verða í gangi og er ekki á mínu borði, en menn telja aðstæður þannig að það sé rétt að ég komi aftur og fyrir það er ég sjálfsögðu þakklátur.“

Björgólfur Jóhannsson og Þorsteinn Már Baldvinsson, sitjandi forstjórar Samherja.Vísir/Sigurjón

Ekki verið kallaður til skýrslutöku

Hvernig miðar þeirri rannsókn áfram hjá Wikborg Rein?

„Ég er ekki í þeim samskiptum. Það er á borði Björgólfs og stjórnar og eins og menn sögðu þá er stefnt að því að ljúka þessu í vor en sjálfsagt geta þær aðstæður sem nú eru haft einhver áhrif á það, en ég er ekki inn í þeim málum.“

Þorsteinn segist ekki hafa verið í samskiptum við Embætti héraðssaksóknara eða skattrannsóknarstjóra vegna rannsóknar þeirra á starfsemi Samherja. Aðrir starfsmenn félagsins og lögmaður þess hafi hins vegar átt í samskiptum við þá aðila.

Sjá einnig: Samherjamálið skref fyrir skref

„Stjórn Samherja lýsti því strax yfir að hún myndi vinna með öllum þeim yfirvöldum á viðkomandi stöðum og það hefur verið gert. Þannig að ég held að þeim aðilum séu veittar þær upplýsingar sem þeir óska eftir en ég hef ekki verið í samskiptum við þá.“

Hann segist hvergi hafa verið kallaður til skýrslutöku í tengslum við rannsókn á starfsemi félagsins í Namibíu og að aðrir starfsmenn hafi ekki heldur farið í skýrslutöku hjá áðurnefndum embættum.

„Það hefur enginn verið kallaður til, eftir því sem ég best veit.“

Næg verkefni fram undan

Erfitt ástand er víða á erlendum fiskmörkuðum þessa dagana vegna faraldurs kórónuveiru.

„Það eru þessi útgöngubönn sem er búið að grípa til bæði í Frakklandi, Spáni og í Bretlandi. Að sjálfsögðu kemur það mjög við fiskvinnslu og útgerð. Það er búið að loka öllum veitingastöðum sem er auðvitað stór markaður fyrir fiskafurðir og þá sértaklega í Bandaríkjunum. Það hefur að sjálfsögðu haft gríðarleg áhrif á reksturinn.“

Þorsteinn Már fundaði með starfsfólki fyrirtækisins á Dalvík stuttu eftir að umfjöllun hófst um hin svonefndu Samherjaskjöl.visir/Tryggvi Páll

Auk þess hafi öll dreifing fisks orðið erfiðari með minnkandi samgöngum milli landa. Nú þegar hafi verið gripið til þess ráðs að minnka starfshlutfall fólks í fiskvinnslum Samherja og starfar það nú annan hvern dag.

Sjá einnig: Fjölgar um sex í rannsóknarteymi héraðssaksóknara í kjölfar Samherjamálsins

„Þetta er í raun bara verkefni á næstunni, bæði mín og annarra starfsmanna Samherja. Það er að sjálfsögðu annars vegar að reyna að tryggja heilsu fólks og síðan reyna að vinna að því með þeim hvernig fjárhag þeirra er best borgið og hins vegar hvaða lausnir við finnum saman til að dreifa fisknum.“

Mætir til starfa strax í fyrramálið

Ef þessi faraldur líður hjá á næstunni og þú sérð fram á að það verði búið að afstýra þessum erfiðu fjárhagsaðstæðum sem ríkja hjá fyrirtækinu áður en rannsókn Wikborg Rein er lokið, myndir þú íhuga að stíga aftur til hliðar þar til niðurstaða fáist?

„Núna eru bara fyrir mér næg verkefni fram undan, það er að segja hver dagur er síbreytilegur. Ég ætla bara að láta það nægja að einbeita mér að því sem er að gerast í dag og á morgun og næstu daga þannig að ég ætla ekki að velta því fyrir mér í augnablikinu.“

Þorsteinn hyggst mæta aftur til starfa í fyrramálið.


Tengdar fréttir

Þorsteinn Már snýr aftur í stól forstjóra Samherja

Stjórn Samherja ákvað í dag að Þorsteinn Már Baldvinsson snúi aftur til starfa og verði forstjóri við hlið Björgólfs Jóhannssonar sem gegnir forstjórastarfi sínu áfram þar til annað verður ákveðið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
TM
3,82
11
225.684
SYN
3,65
9
11.564
ARION
1,51
50
1.351.374
EIM
1,49
5
611
KVIKA
1,43
3
32.124

Mesta lækkun dagsins


Félag
Br.%
Fjöldi
Velta*
ICEAIR
-8,33
78
16.099
SIMINN
-4,19
19
295.432
FESTI
-2,31
9
51.897
EIK
-1,66
5
23.047
SJOVA
-1,45
12
46.997
Velkomin á Vísi. Þessi vefur notar vafrakökur. Sjá nánar.