Leeds hefur heillað marga hlutlausa fótboltaáhugamenn undir stjórn Bielsa á leiktíðinni fyrir heillandi sóknarbolta en þrátt fyrir það hefur liðið tapað sjö leikjum af fjórtán og fengið á sig 30 mörk, flest allra liða í deildinni.
„Það er brjálæði að spila eins og Bielsa gerir. Fólk segir að þessi fótbolti sé skemmtilegur áhorfs en þeir hefðu getað tapað með tveggja stafa tölu fyrir Manchester United. Ef ég væri stuðningsmaður Leeds myndi ég ekki vilja að liðið væri niðurlægt af Manchester United, sama hversu flottur fótboltinn væri,“ sagði Merson.
„Öll liðin eru farin að sjá hvernig Leeds spilar. Öll eru þau nú farin að spila leikmönnum gegn þeim sem eru hraðir og góðir einn á einn. Þegar þú horfir á leik með Leeds og veist ekki hver staðan er þá veistu ekki hvort þeir eru að vinna eða tapa, þeir spila eins sama hver staðan í leiknum er. Það getur ekki verið rétt.
Ég elska að horfa á þá. Fólk segir að þjálfarinn sé sá besti í heimi en hvernig getur það verið? Bestu þjálfararnir vinna. Ég spilaði fótbolta til að vinna eitthvað, ekki til að vera uppáhaldslið allra hlutlausra. Fólki finnst gaman að horfa á þetta þar til þú vinnur. Um leið og þú ferð að lyfta bikurum hættir fólk að horfa. Leeds getur ekki spilað svona áfram, þetta pirrar mig.“
Leeds mætir Burnley kl. 12:00 í ensku úrvalsdeildinni í dag, áhugaverð viðureign þar sem ólíkir leikstílar Marcelo Bielsa og Sean Dyche mætast.
