Erlent

Fjarskiptabúnaði stolið úr rússneskri „dómsdagsvél“

Hólmfríður Gísladóttir skrifar
Ilyushin Il-80 á flugi yfir Moskvu.
Ilyushin Il-80 á flugi yfir Moskvu. Wikimedia Commons/Leonid Faerberg

Þjófum tókst að brjótast inn í herflugvél á flugvelli í Rostov-héraði í Rússlandi fyrir helgi, sem er ef til vill ekki í frásögur færandi nema um var að ræða eina af fjórum „dómsdagsvélum“ rússneska hersins.

Vélin er af gerðinni Ilyushin Il-80 og hefur staðið á flugvellinum í hafnarborginni Taganrog síðan í upphafi síðasta árs. Viðgerðir standa yfir á vélinni.

Upp komst um innbrotið við reglubundna athugun en þjófarnir höfðu á brott með sér 39 hluti af fjarskiptabúnaði. Búnaðurinn var allur til staðar þegar athugun fór fram 26. nóvember.

Málið er nú til rannsóknar hjá lögreglu.

Il-80 vélarnar fjórar eru hannaðar til að gegna hlutverki stjórnstöðva ef kjarnorkustríð brýst út. Ef svo fer mun ein þeirra t.d. fljúga með forseta landsins innanborðs, sem mun m.a. getað skipulagt og fyrirskipað kjarnorkuárás frá vélinni. 

Mikil leynd ríkir yfir hönnun vélanna en engir gluggar eru á þeim nema í stjórnklefanum og þá eru þær sagðar geta staðist högg frá kjarnorkusprengingu. Varnarmálaráðherrann Alexei Krivoruchko sagði í fyrra að unnið væri að uppfærslu vélanna.

Bandaríkin eiga og viðhalda flugvélaflota í sama tilgangi, þ.e. til að gegna hlutverki færanlegra stjórnstöðva, en bandarísku vélarnar heita E-4B Nightwatch.

BBC sagði frá.

Rússland
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið