Sameinast um þróun fjölnota 2ja-hreyfla rafmagnsflugvélar

Kristján Már Unnarsson skrifar 1. nóvember 2020 22:19

Ítalska flugvélin Tecnam P2012. Rafmagnsflugvél Tecnam og Rolls Royce verður byggð á grunni þessarar vélar. Tecnam

Ítalski flugvélaframleiðandinn Tecnam og breski hreyflaframleiðandinn Rolls Royce hafa tekið höndum saman um að þróa tveggja hreyfla rafmagnsflugvél. Flugvélin kallast P-Volt og verður í flokki smærri farþegavéla fyrir styttri og meðallangar flugleiðir.

Rafmagnsflugvélin verður byggð á grunni hinnar ellefu sæta Tecnam P2012-vélar ítalska fyrirtækisins. Hún er hugsuð sem fjölnota flugvél; sem níu sæta farþegavél, fraktvél, sjúkraflugvél eða til sérhæfðra verkefna. Miðað við stærð gæti hún hentað rekstri íslenskra flugfélaga eins og Ernis, Mýflugs og Norlandair.

Svona á Tecnam P-VOLT, rafmagnsflugvél Tecnam og Rolls Royce, að líta út.Tecnam

Fyrirtækin Tecnam og Rolls Royce gefa annars lítið upp um tæknilega eiginleika flugvélarinnar. Þau segja ekkert um hraða hennar né flugþol, né hvenær ætlunin sé að hún verði tilbúin. Segjast þó stefna að því að þetta verði fyrsta rafmagnsflugvélin af þessari stærð sem komi í almenna notkun og að hún verði áreiðanlegri, viðhaldsminni, endingarbetri og mun hagkvæmari en hefðbundnar flugvélar.

Tecnam og Rolls-Royce voru áður komin í samstarf með austurríska vélaframleiðandanum BRP-Rotax um þróun lítillar einshreyfils fjögurra sæta hybrid-flugvélar. Sú vél er einnig byggð á grunni bensínknúinnar Tecnam-vélar.

Tecnam hefur sérhæft sig í smíði smærri flugvéla og skapað sér gott orð á því sviði. Þannig keypti Flugskóli Íslands fyrir fimm árum fjórar nýjar 2ja sæta Tecnam-kennsluvélar beint frá verksmiðjunum en þær eru staðsettar norðan við Napóli. Þá er Flugskólinn Geirfugl, stærsti flugklúbbur landsins, með fjögurra sæta Tecnam-vél.

Rolls Royce-rafmagnshreyfillinn keyrður upp. Honum er ætlað að setja hraðamet á rafmagnsflugvél.Rolls Royce

Rolls Royce, sem er næststærsti framleiðandi flugvélahreyfla í heiminum, vinnur að öðru athyglisverðu þróunarverkefni á sviði rafmagnsflugs; að smíða nægilega öflugan hreyfil til að setja hraðamet á rafmagnsflugvél. Verkefnið kallast ACCEL og er unnið í samstarfi við rafvélaframleiðandann YASA og flugþróunarfélagið Electroflight.

Framleiðendur stefna að því að þessi flugvél nái yfir 480 kílómetra hraða og setjið hraðamet rafmagnsflugvélar.Rolls Royce, Electroflight

Fyrirtækin hafa þegar sýnt myndband af uppkeyrslu á 500 hestafla rafmagnshreyfli framan á flugvélargrind vélar sem kallast „IonBird“. Stefnt er að fyrsta flugi snemma á næsta ári og er vonast til að rafmagnsflugvélin nái yfir 300 mílna hraða, eða yfir 480 kílómetra hraða á klukkustund.

Hér má sjá frétt Stöðvar 2 frá því í júní þegar einshreyfils níu-sæta rafmagnsflugvélin MagniX flaug í fyrsta sinn:

Fréttir af flugi Umhverfismál Loftslagsmál Samgöngur Orkumál Ítalía

Tengdar fréttir

Spáir því að Íslendingar fljúgi á rafmagni innan 7 til 8 ára

Rafmagnsbylting er framundan í flugsamgöngum, að mati flugáhugamannsins Friðriks Pálssonar, sem spáir því að rafknúnar flugvélar verði farnar að fljúga í innanlandsfluginu innan sjö til átta ára.

9. júní 2020 23:24

Kynna rafknúnar vetnisvélar sem leið til orkuskipta í flugi

Dash 8-flugvélum, eins og þeim sem notaðar eru hérlendis í innanlandsfluginu, verður hægt að fljúga á mengunarlausu vetni eftir fjögur ár í stað flugvélabensíns, nái áform bandarísks fyrirtækis fram að ganga. Flugvélaframleiðendur horfa nú til vetnis sem milliorkugjafa fyrir rafknúnar flugvélar.

12. október 2020 22:12

Samfylkingin vill rafvæðingu flugsins á samgönguáætlun

Þingmenn Samfylkingarinnar hafa lagt til á Alþingi að rafvæðing styttri flugferða verði strax sett inn á samgönguáætlun. Fyrsti flutningsmaður, Albertína Elíasdóttir, segir raunhæft að innanlandsflugið verði rafvætt á næstu fimm til átta árum.

10. júní 2020 23:33

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir