Apabrauð Evu Laufeyjar

Matgæðingurinn Eva Laufey Kjaran sýndi þessa sniðugu uppskrift af apabrauði eða Monkey Bread á Instagram. Það þarf að leyfa deiginu að hefast í klukkustund svo gott er að gefa sér góðan tíma í þennan bakstur. Uppskriftina má finna hér fyrir neðan en aðferðina má svo auðvitað líka sjá betur í highlights á Instagramminu hennar Evu Laufeyjar HÉR. 

Deigið

• 1 egg
• 60 g sykur
• 3 dl mjólk
• 500 g hveiti
• 2 tsk þurrger
• ½ tsk salt
• 1 tsk kanill
• 80 g smjör við stofuhita

Aðferð

1. Fyrsta skrefið er að hita mjólkina þar til hún er volg (en alls ekki heit)
2. Setjið þurrgerið og smá sykur saman við. Hrærið og leggið viskastykki yfir skálina í 2-3 mínútur.
3. Og setjið svo öll hráefnin út í hrærivélaskál og passið að hafa smjörið við stofuhita.
4. Hnoðið í vél eða með höndum þar til deigið er orðið slétt og fínt. Ef ykkur finnst það of blautt bætið þá smá hveiti saman við.
5. Leggið visastykki yfir skálina og leyfið deiginu að hefast í klukkustund.
6. Skerið deigið í jafn litla bita og mótið kúlur.
7. Veltið kúlunum upp í sykurblöndunni* (sjá hér fyrir neðan) og raðið svo í smurt form.
8. Apabrauðið fer svo inn í ofn við 180 gráður (blástur) í 35 mínútur.

*Sykurblandan

• 125 g smjör (brætt)
• 150 g púðursykur
• 3 tsk kanill
• 1 tsk vanillusykur