Erlent

Finnar nota hunda til að þefa uppi smitaða flugfarþega

Kjartan Kjartansson skrifar
Kossi er einn hundanna sem á að þefa uppi kórónuveirusmitaða farþega í flugstöðinni í Vantaa. Hann var áður björgunarhundur á Spáni og hefur reynslu af því að þefa eftir krabbameini í fólki.
Kossi er einn hundanna sem á að þefa uppi kórónuveirusmitaða farþega í flugstöðinni í Vantaa. Hann var áður björgunarhundur á Spáni og hefur reynslu af því að þefa eftir krabbameini í fólki. Vísir/EPA

Hundar sem eru þjálfaðir til að greina kórónuveirusmit þefa nú af farþegum sem fara um Vantaa-flugvöll í Helsinki í tilraunaskyni. Ekki hefur verið sýnt fram á getu hundana til þess að þefa uppi smitað fólk með vísindalegum rannsóknum og eru þeir því notaðir samhliða hefðbundinni skimun.

Tíu leiðbeinendur með fimmtán hunda eru nú í þjálfun til að þefa uppi veiruna en einkarekinn dýraspítali fjármagnar tilraunaverkefnið.

Anna Hielm-Björkman, aðjúnkt við Háskólann í Helsinki og sérfræðingur í fylgdardýrum, segir Reuters-fréttastofunni að hundarnir geti numið sjúkdóminn allt að fimm dögum áður en sá smitaði finnur fyrir einkennum.

Farþegar sem bjóða sig fram til þess að taka þátt í tilrauninni nudda grisju við hálsinn á sér sem er sett í dós. Starfsmenn fara með dósina í annað herbergi þar sem hundarnir rýna í grisjuna með trýninu.

Timo Aronkyto, varaborgarstjóri Vantaa, segist sjá fyrir sér að í framtíðinni gætu sérþjálfaðir hundar farið um á milli farþega líkt og tollleitarhundar gera fyrir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×