Um 90 prósent starfs­fólks SAS sagt upp tíma­bundið

Norræna flugfélagið SAS hefur virkjað ákvæði samninga og sagt tímabundið upp um 90 prósent starfsfólks vegna áhrifa kórónuveirunnar á starfsemina. Er um að ræða um 10 þúsund manns.

Frá þessu greindi forstjórinn Rickard Gustafson á fréttamannafundi nú síðdegis. Þessi tímabundna uppsögn (n. permittering) felst í því að ríkið kemur að greiðslu launa að ákveðnum tíma loknum. Er þessi möguleiki fyrir hendi til að draga úr fjöldauppsögnum þegar hart er í ári. 

Hann vonast til að ekki muni koma til varanlegra uppsagna þó að ekki sé hægt að útiloka slíkt. Hann segir aðgerðirnar nauðsynlegar vegna stöðunnar sem upp er komin.

Gustafsson sagði að starfsemi flugfélagsins muni að stærstum hluta leggjast af tímabundið á morgun, 16. mars. Fáein flug eru áætluð hjá félaginu í næstu viku, sem snúa að því að koma Norðurlandabúum aftur til heimalandsins.