Körfubolti

Jordan vann Tígrisdýrakónginn

Ingvi Þór Sæmundsson skrifar
Michael Jordan var miðpunktur þáttaraðarinnar The Last Dance.
Michael Jordan var miðpunktur þáttaraðarinnar The Last Dance. getty/Sporting News

The Last Dance, heimildaþáttaröðin um tímabilið 1997-98 hjá Chicago Bulls, fékk Emmy-verðlaun í flokki heimildaþátta eða efnis byggðu á sannsögulegum atburðum. Emmy-verðlaunahátíðin fór fram með óhefðbundnu sniði í nótt vegna kórónuveirufaraldursins.

ESPN framleiddi The Last Dance þar sem fylgst er með Michael Jordan og félögum í Chicago Bulls tímabilið 1997-98. Í The Last Dance er einnig farið yfir feril Jordans sem er miðpunktur þáttaraðarinnar.

Í The Last Dance var mikið af áður óséðu efni sem Jordan gaf loksins leyfi fyrir að nota. Einnig var rætt við persónur og leikendur á blómaskeiði Chicago Bulls á 10. áratug síðustu aldar.

Auk The Last Dance voru American Masters, Hillary, McMillion$ og Tiger King tilnefnd í flokki heimildaþátta eða efnis byggðu á sannsögulegum atburðum. Þetta er í fyrsta sinn sem ESPN vinnur Emmy-verðlaun í þessum flokki.

The Last Dance fékk mikið áhorf enda voru þættirnir sýndir þegar keppni í nánast öllum íþróttum lá niðri vegna kórónuveirufaraldursins.

Mikið gekk á tímabilið 1997-98 hjá Chicago Bulls sem var það síðasta hjá Jordan, Scottie Pippen og þjálfaranum Phil Jackson hjá félaginu. The Last Dance heitið er komið frá Jackson sem vissi að tímabilið 1997-98 yrði hans síðasta hjá Chicago Bulls.

Jordan tryggði Chicago Bulls sjötta meistaratitilinn á átta árum með sigurkörfu í leik gegn Utah Jazz í Salt Lake City. Chicago Bulls vann einvígið, 4-2.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.