Al­fons lagði upp mark í enn einum sigrinum og Hólmar fór beint í liðið

Alfons Sampsted og félagar í Bodo/Glimt halda siglingunni áfram í norska boltanum en þeir unnu Brann á útivelli í dag, 3-1.

Alfons spilaði allan leikinn í hægri bakverðinum hjá toppliðinu en Bodo/Glimt er með sextán stiga forskot á toppi deildarinnar. Unnið sextán leiki og gert tvö jafntefli.

Hólmar Örn Eyjólfsson fór beint í byrjunarliðið hjá Rosenborg sem vann 2-1 sigur á Haugesund á heimavelli. Hólmar Örn nældi sér í gult spjald í fyrri hálfleik en hann gekk í raðir liðsins í gær.

Rosenborg er í 3. sætinu með 32 stig.

Viðar Ari Jónsson spilaði allan leikinn fyrir Sandefjord sem gerði markalaust jafntefli við Stromsgödset á heimavelli. Ari Leifsson sat allan tímann á bekknum en Valdimar Þór Ingimundarson var ekki í leikmannahópi Stromsgödset.

Liðin eru í 12. og 13. sætinu, Sandefjord sæti neðar með stig minna.

Jóhannes Harðarson og lærisveinar hans í Start töpuðu 2-1 fyrir Kristiansund á heimavelli. Starte r í 14. sætinu, fimm stigum frá öruggu sæti.

Davíð Kristján Ólafsson var í byrjunarliði Álasund sem tapaði 4-2 fyrir Víking á útivelli. Axel Óskar Andrésson spilaði allan leikinn í liði Viking.

Álasund er á botninum með sjö stig en Viking er í sjöunda sætinu með 25 stig.

Í Svíþjóð gerðu Norrköping og Malmö 1-1 jafntefli. Norrköping jafnaði í uppbótartíma en Arnór Ingvi Traustason og Ísak Bergmann Jóhannesson spiluðu allan leikinn fyrir sitt hvort liðið.

Malmö er á toppnum með 41 stig en Norrköping er í 4. sætinu með 33 stig.