Fjögurra fugla hringur hjá Guðmundi Ágústi í Portúgal

Guðmundur Ágúst Kristjánsson byrjaði mjög vel á Opna portúgalska meistaramótinu sem fer fram á Royal Óbidos vellinum og hófst í dag .

Guðmundur Ágúst Kristjánsson lék fyrsta hringinn á Opna portúgalska meistaramótinu á 69 höggum eða þremur höggum undir pari.

Hann er eins og er í þriðja til sjötta sæti ásamt þremur öðrum kylfingum. Guðmundur Ágúst fékk alls fjóra fugla á hringnum þar af tvo þeirra á fyrstu fimm holunum.

Guðmundur Ágúst hefði verið í betri stöðu hefði hann sloppið við skolla á sautjándu en hann svaraði því strax með því að fá fugl á átjándu holunni.

Haraldur Franklín Magnús er einnig að spila á mótinu en átti rástíma miklu seinna en Guðmundur. Haraldur Franklín lék fyrstu sex holurnar á þremur höggum yfir pari.

Mótið í Portúgal er það fimmta hjá Guðmundi Ágústi á Evrópumótaröðinni. Hann hefur einu sinni komist í gegnum niðurskurðinn á Evrópumótaröðinni og endaði þá í 57. sæti á Euram Bank Open sem fram fór í Austurríki í byrjun ágúst á þessu ári.