Viðskipti innlent

Ríkis­sjóður hefur greitt átta milljarða í laun starfs­manna á upp­sagnar­fresti

Hallgerður Kolbrún E. Jónsdóttir og Berghildur Erla Bernharðsdóttir skrifa
Ríkissjóður hefur greitt um átta milljarðar króna í launagreiðslur starfsmanna ferðaþjónustufyrirtækja á uppsagnarfresti. 
Ríkissjóður hefur greitt um átta milljarðar króna í launagreiðslur starfsmanna ferðaþjónustufyrirtækja á uppsagnarfresti.  Vísir/Vilhelm

Ríkissjóður hefur þegar greitt tæpa átta milljarða króna vegna launakostnaðar starfsmanna á uppsagnafresti hjá fyrirtækjum tengd ferðaþjónustu síðustu mánuði.

Í lögum um stuðning úr ríkissjóði vegna greiðslu hluta launakostnaðar fyrirtækja á uppsagnafresti starfsfólks sem tóku gildi í júní á þessu ári kemur fram að stuðningur ríkisins geti að hámarki verið 85% af launakostnaði launamanns á uppsagnafresti þó að hámarki 633.000 á mánuði. 

Frá því lögin tóku gildi hafa 272 fyrirtæki nýtt sér úrræðið og hafa samtals fengið greitt um átta milljarða króna úr ríkissjóði. 

Foto: HÞ

Icelandair hefur fengið langmesta stuðninginn eða tæpa 2,9 milljarða króna vegna um 1900 starfsmanna. Flugleiðahótel eru næst stærst með 452 milljónir króna vegna 480 starfsmanna, Þá hefur Bláa lónið hefur fengið 425 milljónir vegna 540 starfsmanna. Átta fyrirtæki hafa fengið 100-200 milljónir í uppsagnastyrki. 

Ef rýnt er í listann af handahófi sést að Flugfélag Íslands hefur fengið 70 milljónir króna, Guide to Iceland um 28 milljónir, Landnámsetrið 18 milljónir, Hótel Húsafell 7,5 milljónir, Grillmarkaðurinn 6,2 milljónir og Tix miðasala um 4,6 milljónir króna. 

Bjarnheiður Hallsdóttir, formaður Samtaka ferðaþjónustunnar.

Uppsagnafrestur starfsfólks er ýmist liðinn eða lýkur um næstu eða þar næstu mánaðarmót en fram kom í hádegisfréttum hjá formanni Samtaka ferðaþjónustunnar að um 90% af starfsfólki í greininni verði horfið úr greininni á næstu mánuðum. Úrræði stjórnvalda dugi skammt.

Kallar eftir frekari styrkjum

Enn er kallað eftir aðgerðum til hjálpar ferðaþjónustunni. Jóhannes Þór Skúlason, framkvæmdastjóri Samtaka ferðaþjónustunnar segir í viðtali í kvöldfréttum Stöðvar 2 að mikilvægt sé að halda lykilfólki áfram í starfi svo hægt sé að rétta ferðaþjónustuna við hraðar þegar hægt verður að fara aftur á fulla ferð.

Hann segir mikilvægt að ferðaþjónustan fái sértæka styrki til að „halda loganum lifandi.“

„Þetta snýst allt um það að verja verðmætasköpunaraflið sem liggur í útflutningsatvinnugreinunum, þar er ferðaþjónustan líklegust til að vera kvikust á fæturna fram í tímann þannig að við þurfum að halda loganum lifandi,“ segir Jóhannes.

Jóhannes Þór Skúlason framkvæmdastjóri Samtaka ferðaþjónustunnar, kallar eftir því að ferðaþjónustan fái beina styrki frá ríkinu til að halda lykilstarfsmönnum í vinnu. Vísir/vilhelm

„Að geta haldið fólkinu, lykilfólkinu sem er með þekkinguna, viðskiptasamböndin, sér um fasteignirnar og tækin, selur inn í næsta sumar til þess að við fáum það út úr greininni sem við getum fengið sem samfélag. Það lágmarkar þá kostnaðinn sem við tökum út á þeim enda. Í rauninni snýst þetta um að leggja minna fé núna fram til að viðhalda verðmætasköpunaraflinu til að fá meira út úr því þegar við komumst af stað aftur.“

Hann segir skynsamlegt að ferðaþjónustan fái beina styrki til að halda fólki í starfi. Hann eigi þá ekki við víðtæka styrki heldur styrki til að halda lykilfólki í starfi. „Við erum með kerfi í gegn um uppsagnarstyrkina sem kemur í veg fyrir misnotkun, það er hægt að nýta það áfram, og það þýðir að við eigum möguleika á að halda loganum lifandi hjá fyrirtækjum sem að skapa verðmæti fyrir okkur öll inn í næsta ár.“


Tengdar fréttir

Icelandair mikilvægt í endurreisn Íslands

Uppgangur í flugi og ferðaþjónustu síðasta áratuginn hefur gjörbylt efnahagslífi landsins, skapað verðmæti og störf, bætt lífskjör og haft góð áhrif á byggðaþróun. Samfara hröðum vexti hafa verðmæti innviða aukist til muna.

Bankarnir með líf margra ferðaþjónustufyrirtækja í sínum höndum

Níu af hverjum tíu ferðaþjónustufyrirtækjum leggjast í dvala um næstu og þarnæstu mánaðarmót og fjöldi fólks er á leið á atvinnuleysisbætur að sögn framkvæmdastjóra Eldingar. Greinin tali fyrir því að fá rekstrarstyrki frá ríkissjóði svo hægt sé að viðhalda ráðningarsambandi við starfsfólk.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
HAGA
3,31
17
596.829
ICEAIR
2,61
9
6.646
ICESEA
2,01
2
4.834
BRIM
1,7
3
23.042
ARION
0,94
8
106.188

Mesta lækkun dagsins


Félag
Br.%
Fjöldi
Velta*
REGINN
-2,77
14
106.756
REITIR
-1,74
12
63.780
MAREL
-1,17
38
376.941
SYN
-1,02
5
1.145
EIK
-0,96
10
156.375
Velkomin á Vísi. Þessi vefur notar vafrakökur. Sjá nánar.