Golf

Guðrún Brá upp um heil 46 sæti á heimslistanum

Óskar Ófeigur Jónsson skrifar
Guðrún Brá Björgvinsdóttir vann Íslandsmeistaratitilnn í höggleik þriðja árið í röð á dögunum.
Guðrún Brá Björgvinsdóttir vann Íslandsmeistaratitilnn í höggleik þriðja árið í röð á dögunum. Mynd/GSÍmyndir/SETH

Keiliskonan Guðrún Brá Björgvinsdóttir hoppar upp um 46 sæti nýjum á heimslista atvinnukylfinga í kvennaflokki sem var uppfærður í byrjun vikunnar.

Guðrún Brá endaði í fjórtánda sæti á LET Access mótaröðinni um síðastliðna helgi. Mótaröðin er sú næst sterkasta hjá atvinnukonum í Evrópu. Guðrún Brá er í sæti númer 875 á heimslistanum í þessari viku. Besti árangur hennar frá upphafi er sæti númer 790.

Guðrún Brá varð Íslandsmeistari í golfi þriðja árið í röð í síðasta mánuði og fylgdi því nú eftir með góðum árangri á Flumserberg Ladies Open mótinu í Sviss.

Guðrún Brá tryggði sér keppnisrétt á Evrópumótaröðinni á lokaúrtökumóti LET sem fram fór á La Manga golfsvæðinu á Spáni í byrjun ársins. Kóróunveiran sá til þess að hún hefur lítið keppt til þessa en hún er að bæta úr því þessar vikurnar.

Þrír íslenskir kylfingar eru á heimslista atvinnukylfinga í kvennaflokki.

Valdís Þóra Jónsdóttir úr Leyni er í 569. sæti á þessum lista þrátt fyrir að hún hafi ekkert keppt að undanförnu vegna meiðsla. Ólafía Þórunn Kristinsdóttir úr GR er síðan í sæti númer 846.

Valdís Þóra fellur niður um fjögur sæti og Ólafía Þórunn fór niður um fimm sæti að þessu sinni.

Meiðslin hafa svo sannarlega sett sitt strik í reikninginn hjá Valdísi Þóru sem var í 535 sæti í mars.

Ólafía Þórunn var komin niður í 915. sæti á listanum sem kom út 24. ágúst en hafði hækkað sig um 74 sæti á listanum sem var gefinn út í lok ágúst. Hún tók þetta stökk eftir að hafa náð tuttugasta sætinu á opna tékkneska meistaramótinu

Guðrún Brá var í 921. sæti á listanum sem var gefinn út 31. ágúst en nálgast nú Ólafíu Þórunni verulega. Nú munar á þeim 29 sætum.

Guðrún Brá Björgvinsdóttir og Ólafía Þórunn Kristinsdóttir eru báðar á meðal keppenda á atvinnumóti sem fram fer á Golfpark Holzhausern í Sviss og hófst í dag.

Jin Young Ko frá Suður-Kóreu er efst á heimslistanum og í öðru sæti er síðan hin bandaríska Danielle Kang.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.