Formúla 1

Ferrari stöðvar framleiðslu

Runólfur Trausti Þórhallsson skrifar
Ferrari hefur stöðvað framleiðslu á Formúlu 1 bílum sínum.
Ferrari hefur stöðvað framleiðslu á Formúlu 1 bílum sínum. Chris Putnam/Barcroft Media/Getty Images

Ítalski bílaframleiðandinn Ferrari hefur stöðvað framleiðslu á Formúla 1 bílum, sem og götubílum, vegna kórónuveirunnar. Faraldurinn hefur verið einkar skæður á Ítalíu og alls hafa 1440 dáið þar til þessa.

Ferrari hefur sagt að ákvörðunin, að loka verksmiðjum sínum, sé tekin með velferð starfsmanna fyrirtækisins að leiðarljósi. Bílaframleiðandinn vill koma til móts við ítölsk stjórnvöld í von um að þetta hefti frekari útbreiðslu veirunnar.

Aðrir Formúlu 1 bílaframleiðendur ætla sem stendur að halda áfram vinnu sinni. Til að mynda munu báðar verksmiðjur Mercedes á Bretlandseyjum halda áfram starfsemi sinni en allir starfsmenn Formúlu liðs Mercedes sem lögðu land undir fót og fóru til Melbourne í Ástralíu þurfa að sitja tvær vikur í einangrun eftir heimkomu.

Ákvörðun Ferrari kemur í kjölfar ótímabundinnar frestunar á keppnistímabili Formúlu 1 en keppni átti að fara fram í Melbourne í Ástralíu um helgina. Keppninni var frestað og í kjölfar var hætt við keppnir í Bahrain sem og Víetnam.

Fjórða keppni ársins hefði átt að vera í Kína en henni var frestað strax í febrúar.

Óljóst er hvenær keppni mun hefjast á ný en mismunandi upplýsingar koma frá ráðamönnum Formúlu 1. Federation Internationale de l´Automobile (FIA) segir eitt á meðan F1 hópurinn, eigandi auglýsingaréttar Formúlu 1, segir annað.

FIA vonast til þess að hægt verði að hefja keppni í Evrópu þann 1. maí. Hins vegar telur FI hópurinn að ekki sé mögulegt að hefja keppni fyrr en í lok maí vegna útbreiðslu COVID-19 veirunnar í Evrópu. Þá væri möguleiki á að fresta þyrfti enn frekar og ómögulegt væri að taka ákvörðun þess efnis að svo stöddu.

Í frétt BBC um málið eru Formúlu 1 lið að undirbúa sig undir að fyrsta keppnin verði í Azerbaídjan þann 7. júní næstkomandi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.