Körfubolti

Áfram draumur hjá Luca Doncic en martröð fyrir Steve Kerr

Óskar Ófeigur Jónsson skrifar
Luka Doncic er bara tvítugur en strax kominn í hóp bestu leikmanna NBA-deildarinnar.
Luka Doncic er bara tvítugur en strax kominn í hóp bestu leikmanna NBA-deildarinnar. Getty/Glenn James

Það spila fáir betur í NBA-deildinni þessa daganna en Slóveninn Luka Doncic sem átti enn einn stórleikinn með Dallas Mavericks liðinu í nótt.

Luka Doncic náði þrennu í ellefta skiptið á tímabilinu þegar Dallas Mavericks vann 118-110 sigur á Chicago Bulls en það var einkum þriðji leikhlutinn sem stóð upp úr hjá Luka Doncic.



Luka Doncic endaði með 38 stig, 11 fráköst og 10 stoðsendingar en hann skoraði 21 stig í þriðja leikhlutanum þar af 17 af 19 stigum Dallas liðsins á síðustu 5:35 í leikhlutanum. Á þessum sama kafla náði Dallas Mavericks forystunni sem liðið hélt út allan leikinn.

Þjálfarinn Rick Carlisle hrósaði sínum manni fyrir hvernig hann tók á varnartilburðum mótherjanna. „Það flottasta við hans frammistöðu í kvöld var hátterni hans og sjálfsstjórn. Liðin eru að senda íþróttamenn á hann sem láta hann finna fyrir því en hann heldur alltaf haus,“ sagði Rick Carlisle.

Luka Doncic er líka þekktur fyrir að velta sér ekki mikið upp úr tölfræðinni sinni eftir leiki. „Það sem skiptir mig öllu máli er að vinna leikinn. Við þurfum á þessum sigri að halda eftir að hafa tapað síðasta leik (í framlengingu á móti Charlotte) þar sem við áttum að vinna. Liðið mitt hjálpar mér mikið. Við spiluðum af krafti frá byrjun og þannig verður það að vera hjá okkur,“ sagði Luka Doncic.



Dallas lék án Kristaps Porzingis í fjórða leiknum í röð en hann er að glíma við hnémeiðsli. Dwight Powell skoraði 16 stig og hitti úr öllum skotum sínum í leiknum.

Finninn Lauri Markkanen var stigahæstur hjá Chicago Bulls með 26 stig þrátt fyrir að spila á aumum ökkla eftir að hafa misstigið sig í síðasta leik.

Lið San Antonio Spurs sýndi á sér nýja hlið í 126-104 sigri á toppliði Milwaukee Bucks. Leikmenn Spurs settu niður nítján þriggja stiga skot í leiknum og enduðu með þessum góða sigri fimm leikja sigurgöngu Bucks liðsins.

DeMar DeRozan skoraði 25 stig, Patty Mills var með 21 stig og þeir LaMarcus Aldridge og Rudy Gay skoruðu báðir átján stig. Mills hitti úr 6 af 10 þriggja stiga skotum sínum.

Giannis Antetokounmpo skoraði 24 stig, tók 12 fráköst og gaf 8 stoðsendingar hjá Milwaukee Bucks sem tapaði í fyrsta sinn síðan á jóladag. Liðið er áfram með besta sigurhlutfall deildarinnar, 32 sigra í 38 leikjum.



Nikola Jokic skoraði 47 stig í sigri Denver Nuggets á Atlanta Hawks en hann hafði mest áður skorað 41 stig í leik í NBA-deildinni. Jokic hitti úr 16 af 25 skotum og var einnig með 8 fráköst og 5 stoðsendingar.





Steve Kerr fékk ekki að klára leikinn þegar Golden State Warriors tapaði í 29. sinn á tímabilinu nú fyrir Sacramento Kings. Þjálfari Golden State liðsins var rekinn út úr húsi fyrir að öskra á einn dómarann að fara „drulla sér til að fara vakna.“



Úrslitin í NBA-deildinni í nótt:

Sacramento Kings - Golden State Warriors    111-98    

Dallas Mavericks - Chicago Bulls    118-110    

San Antonio Spurs - Milwaukee Bucks    126-104    

New Orleans Pelicans - Utah Jazz    126-128    

Atlanta Hawks - Denver Nuggets    115-123    

Charlotte Hornets - Indiana Pacers    104-115    

Orlando Magic - Brooklyn Nets    101-89    

Philadelphia 76ers - Oklahoma City Thunder    120-113    

Washington Wizards - Boston Celtics    99-94

NBA

Mest lesið


Fleiri fréttir

Sjá meira


×

Mest lesið