Tónlist

Náði að komast í splitt fyrir mynd­bandið eftir árs hlé

Sylvía Rut Sigfúsdóttir skrifar
Cardi B í myndbandinu við lagið WAP. Hún hafði átt teygjulaust ár áður en hún ákvað að skella sér í splitt fyrir myndbandið.
Cardi B í myndbandinu við lagið WAP. Hún hafði átt teygjulaust ár áður en hún ákvað að skella sér í splitt fyrir myndbandið.

Cardi B og Megan Thee Stallion sendu frá sér myndband við lagið WAP í síðustu viku og hefur það vakið mikla athygli. Þegar þetta er skrifað hefur myndbandið verið spilað yfir 75 milljón sinnum á Youtube á örfáum dögum. Myndbandið er djarft en gagnrýnin hefur snúið að einhverju allt öðru en þær áttu von á, eins og meðferð katta og Kylie Jenner.

Cardi B sagði frá því í dag að það hafi ekki verið auðvelt að komast í splitt uppi á stól fyrir tökurnar. Æfði hún splittið sérstaklega fyrir þetta myndband og viðurkenndi að hafa ekki teygt í heilt ár þegar hún hóf æfingar fyrir þetta verkefni. 

Myndbandið fær góðar viðtökur aðdáenda en einhverjir eru þó ósáttir við að raunveruleikastjarnan og snyrtivörurisinn Kylie Jenner kæmur þar fram en Normani, Rosalía, Rubi Rose, Sukihana og Mulatto sjást þar líka. Sumir gengu svo langt að setja af stað undirskriftarsöfnun þar sem þess var krafist að Jenner yrði klippt út úr myndbandinu.

Kylie Jenner kemur fram í myndbandinu WAP.Skjáskot/Youtube

Cardi B svaraði fyrir þetta á Twitter og benti á að hún hafi sínar ástæður fyrir vali á öllum þessum konum. Kylie hafi reynst henni vel og móðir hennar, umboðsmaðurinn Kris Jenner, hafi alltaf verið til staðar fyrir hana sömuleiðis. 

Önnur gagnrýni á myndbandið kom frá stórkattaeigandanum Carole Baskin, sem öðlaðist frægð sem viðmælandi í heimildarþáttunum Tiger King á Netflix. Baskin sagði að rappararnir væru að blekkja fólk með því að klippa stórketti inn í myndbandið og sýndu stórkattaeign í töfraljóma. Auk þess væru þetta pottþétt kettir sem byggju við hræðilegar aðstæður og hefðu þurft að mæta í upptökur í upptökuveri, en ekki fengið að vera úti í náttúrunni eða í athvarfi eins og hennar, The Big Cat Rescue athvarfsins.

Búist er við því að lagið nái toppnum á bandaríska listanum þegar hann verður birtur á föstudag.

Hægt er að horfa á myndbandið við WAP í spilaranum hér fyrir neðan.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.