Erlent

Borgarstjóri Seúl fannst látinn

Stefán Ó. Jónsson skrifar
Park Won-soon hafði verið borgarstjóri frá árinu 2011. Hann var jafnframt orðaður við forsetaembættið.
Park Won-soon hafði verið borgarstjóri frá árinu 2011. Hann var jafnframt orðaður við forsetaembættið. Ap/Lee Jin-man

Borgarstjóri suðurkóresku höfuðborgarinnar Seúl fannst látinn í norðurhluta borgarinnar í dag. Þetta kemur fram í orðsendingu lögreglunnar sem birt er á vef suðurkóreska miðilsins Yonhap. Park Won-soon var 64 ára gamall en lýst var eftir borgarstjóranum þegar hann skilaði sér ekki til vinnu í ráðhúsi Seúlborgar í dag.

Dóttir borgarstjórans segir að hann hafi skilið eftir torræð skilaboð áður en hann yfirgaf heimili sitt um morguninn. Í umfjöllun þarlendra miðla segir að skilaboðin hafi hljómað eins og erfðaskrá. Því eru leiddar að því líkur að um sjálfsvíg sé að ræða. Park mætti ekki heldur til vinnu í gær og bar hann fyrir sig veikindi.

Umfangsmikil leit var gerð að borgarstjóranum.AP/Lee Jin-man

Næstum 800 lögregluþjónar, sjúkraflutninga- og slökkviliðsmenn leituðu að Park við heimili hans og nálægt símamastrinu þangað sem farsími hans tengdist síðast. Hann fannst að endingu í norðurhluta höfuðborgarinnar sem fyrr segir.

Park var kjörinn borgarstjóri Seúl árið 2011 og var hann á þriðja og síðasta kjörtímabili sínu. Hann var af mörgum talinn líklegur forsetaframbjóðandi í kosningum ársins 2022. Hann lætur eftir sig eiginkonu og tvö börn.

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið. Nánari upplýsingar hér.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×