Rafíþróttir

Tókst ekki að bæta heimsmetið en bættu eigið Íslandsmet

Anton Ingi Leifsson skrifar
Eggert Unnar Sæþórsson reyndi við heimsmet á Stöð 2 eSport í gær ásamt þeim Ými og Axel.
Eggert Unnar Sæþórsson reyndi við heimsmet á Stöð 2 eSport í gær ásamt þeim Ými og Axel. mynd/eggert unnar

Rafíþróttamennirnir Axel Guðmundsson, Eggert Gunnar Snæþórsson og Ýmir Kolka Júlíusson reyndu við heimsmet í Call of Duty: Warzone í gær. Það tókst ekki en þeir bættu þó eigið Íslandsmet.

Strákarnir reyndu við heimsmetið í beinni útsendingu á Stöð 2 eSport í gær en það tókst ekki. Þeir þrír áttu þó Íslandsmetið og bættu það í gær en þeir náðu samtals 58 drápum, sem er nýtt Íslandsmet.

„Þeir fóru algjörum hamförum en það tók þá smá tíma að venjast því að spila með ljósin og myndavélarnar og það var ekki fyrr en það leið á kvöldið sem þeir fóru að sýna meistarataktana,“ sagði Aron Ólafsson, framkvæmdastjóri Rafíþróttasambandsins í samtali við Vísi.

„Það var mikill hraði og fjör í útsendingunni. Það var gaman að sjá snerpuna og hæfileikana hjá þessum strákum. Við eigum svo frambærilega rafíþróttamenn og þó að þeir hafi ekki alveg náð heimsmetinu þá sýndu þeir okkur sem heima sátum hversu ótrúlega góðir þeir eru,“ bætti Aron við.

Eggert Unnar var svekktur þegar Vísir heyrði í honum fyrr í dag.

„Já og nei,“ svaraði Eggert er hann var spurður hvort að hann væri sáttur með frammistöðuna.

„Mér fannst við aldrei komast í „“grúv“ og náðum aldrei neinu flæði. Þetta var allt nýtt fyrir okkur og það er eitt að spila heima og annað að vera mættur þarna.“

Hann segir að það komi vel til greina að reyna aftur við metið.

„Nú er boltinn hjá Stöð 2 og spurning hvort eða hvenær þetta verður reynt aftur. Mér finnst það mjög líklegt og þá getum við lært af þessu í gær.“

Gærdagurinn var, eins og áður segir, ekki bara dökkur því þríeykið bætti eigið Íslandsmet.

„Við náðum einum góðum leik og í endann var þetta mjög gaman, svo ég er sáttur við það,“ sagði Eggert.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.