Handbolti

Þórsarar biðu og biðu eftir bikarnum sem fór loksins á loft um síðustu helgi

Óskar Ófeigur Jónsson skrifar
Bikarinn á loft 106 dögum eftir síðasta leik.  Fyrirliðinn Garðar Már Jónsson lyftir bikarnum fyrir sigur í Grill 66 deildinni.
Bikarinn á loft 106 dögum eftir síðasta leik.  Fyrirliðinn Garðar Már Jónsson lyftir bikarnum fyrir sigur í Grill 66 deildinni. Mynd/Ármann Hinrik

Þórsarar eru komnir upp í Olís deild karla í handbolta á ný eftir frábæra frammistöðu í Grill 66 deildinni í vetur og þeir fengu loksins að fagna með bikarinn um síðustu helgi.

Þórsarar höfðu tryggt sig upp um deild áður en til þess kom að mótahald var fellt niður vegna Covid-19 ástandsins. Eftir fimmtán umferðir voru þeir taplausir með 28 stig og höfðu unnið þrettán af fimmtán leikjum sínum.

Verðlaunaafhendingin gat þó ekki farið fram fyrr en miklu seinna. Þórsarar spiluðu síðasta leikinn sinn í Grill 66 deildinni 28. febrúar síðastliðinn þegar þeir unnu átta marka sigur á unglingaliði Vals.

Bikarinn kom síðan norður á laugardaginn og fór því á loft 106 dögum eftir síðasta leik liðsins.

Brynjar Hólm Grétarsson var markahæstur hjá Þórsliðinu í vetur með 92 mörk, Ihor Kopyshynskyi skoraði 82 mörk, Garðar Már Jónsson var með 59 mörk og Valþór Atli Garðarsson skoraði 57 mörk.

Þetta verður fyrsta tímabilið í fjórtán ár sem Þórsarar spila undir eigin nafni en þeir voru hluti af Akureyrarliðinu í mörg. Þór spilaði síðast í efstu deild sem Þór Akureyri veturinn 2005-06.

Handboltastrákarnir í Þór sem komu liðinu aftur upp í hóp þeirra bestu.Mynd/Ármann Hinrik

„Það er að sjálfsögðu mjög jákvætt að koma Þór aftur upp í deild þeirra bestu og gott að vera búnir að tryggja sætið þegar fjórar umferðir eru eftir,“ sagði Halldór Örn Tryggvason, þjálfari Þórsliðsins, í viðtali á heimasíðu Þórs, eftir að sætið í Olís deildinni var tryggt.

„Ég er mjög ánægður með veturinn þegar á heildina er litið. Hópurinn hefur þroskast gríðarlega og samheldnin í liðinu eru orðin mjög mikil; hver og einn er tilbúinn að leggja sig allan fram fyrir hina. Allir eldri leikmennirnir gefa mikið af sér, hjálpa þeim yngri við að verða betri og allir hafa rödd, allir geta lagt eitthvað til málanna til þess að skapa liðsheildina. Ég er ungur þjálfari en strákar sem eru búnir að spila í efstu deild fylgja mér eins og allir hinir,“ sagði Halldór Örn.

Þórsarar fagna sigri í Grill 66 deildinni um síðustu helgi þegar þeir fengu bikarinn loksins afhentan.Mynd/Ármann Hinrik



Fleiri fréttir

Sjá meira


×