„Oft er þetta bara frekja í ökumönnum“

Pétur Marteinn Urbancic, íbúi í miðbæ Reykjavíkur, birti á dögunum Twitter-þráð þar sem hann sagði frá raunum sínum í samskiptum við ökumenn sem ætluðu sér að keyra Laugaveginn. Í gegn um tíðina hefur þótt lítið tiltökumál að taka Laugavegsrúnt eða tvo, en nú er staðan sú að Laugavegurinn, milli Frakkastígs og Klapparstígs, verður göngugata í allt sumar.

Síðastliðinn þriðjudag birti Pétur tíst þar sem hann sagðist ætla að reyna að labba „göngu“ götuna, eins og hann setti það sjálfur fram. Þegar þetta er skrifað hafa 254 skellt „like“ á tístið.

Í þræði fyrir neðan tístið birtir Pétur síðan myndbönd þar sem hann gengur niður Laugaveginn með halarófu bifreiða skammt fyrir aftan sig. Í myndböndunum segist Pétur hafa bent ökumönnum á að akstur götunni væri óheimill, auk þess sem hann sést reyna að leiðbeina ökumönnum inn á götur sem opnar eru fyrir akandi umferð.

Þá sést einnig þegar einn ökumaður virðist keyra á Pétur þegar hann reynir að leiðbeina honum á réttar slóðir. Ökumaðurinn lét þó á endanum segjast og beygði þangað sem leyfilegt er að aka.

Kominn með nóg af bílum á göngugötum

Í samtali við Vísi segir Pétur að kveikjan að uppátækinu, að sýna fram á hve erfitt er að ganga göngugötuna sökum bílaumferðar, hafi einfaldlega verið reynsla hans af ökumönnum sem virði ekki reglurnar.

„Ég á heima þarna rétt hjá og var eiginlega kominn með nóg af þessu. Ég labba þarna daglega og sé alveg að þetta er ekki bara fólk að ruglast. Oft er þetta bara frekja í ökumönnum. Ég var á leiðinni á Loft Hostel að hitta vini mína og ákvað bara að taka myndband meðan ég var að rölta þangað. Datt það bara í hug um leið og ég labbaði út úr húsi,“ segir Pétur og bætir við að ekki hafi verið um „fyrir fram planaða krossferð“ að ræða.

Hann segist fyrst hafa rætt við leigubílstjóra, sem hafi verið nokkuð kurteis, en þó neitað að beygja af leið, þrátt fyrir að hafa verið bent á að gatan sem hann væri á væri göngugata.

„Þegar hann lét loksins segjast, þá kom einhver kona. Hún keyrði nú á mig, svona létt rakst utan í mig. Það kveikti dálítið meira í mér og þá var ekki séns að ég myndi færa mig. Ég reifst eitthvað aðeins við hana og hoppaði upp í göngugötuskiltið og benti á það. Hún svaraði bara með því að skrúfa niður rúðuna og öskra ,Move you fucking idiot!‘“

Pétur segir að miðað við samskipti sín við konuna sé ekki óvarfærið að áætla að hún hafi ekki verið að ruglast. Hún hafi vitað að um göngugötu væri að ræða.

Pétur segir að margir ökumenn hafi þó tekið ábendingum hans um bann við akstri á göngugötunum vel. Sumir séu að ruglast, en aðrir ekki.

Hvatningarorð frá öðrum vegfarendum

Hann segist að mestu hafa fengið góð viðbrögð við uppátækinu, bæði á netinu og á göngugötunni sjálfri.

„Fólk var líka bara ánægt þegar ég var að labba þarna niður. Ég var sá eini á göngugötunni, það voru allir aðrir á gangstéttinni. Enda svo sem ekki mikið pláss fyrir gangandi vegfarendur þegar það var allt fullt af bílum. Það var nú eitthvað fólk þarna sem hrópaði bara hvatningarorð að mér þarna,“ segir Pétur.

Hann segist ekki telja að það hafi hjálpað að lögreglan hefði gefið út að hún myndi ekki sekta ökumenn sem keyrðu á göngugötunum sem um ræðir. Hann skilji þá ekki hvers vegna götunni sé ekki einfaldlega lokað í annan endann.

„Ég held að það byggi á einhverjum misskilningi á nýjum umferðarlögum að það megi ekki. Það má alveg hafa lokað í annan endann og leyfa vörulosun og fötluðum að komast að þannig. Það þarf ekki að vera gegnumstreymisumferð.“

Lögreglan á höfuðborgarsvæðinu birti í fyrradag svar við fyrirspurn á Twitter þar sem fram kom að lögreglan hefði ekki farið þá leið að sekta fyrir brot af þessu tagi. Var meðal annars vísað til fámennis í stéttinni og óskýrra merkinga sem gefa til kynna að um göngugötu sé að ræða. Til að sjá umræðuna sem lögreglan blandaði sér inn í má smella hér.