Körfubolti

Horace Grant segir Jordan ljúga: „Níutíu prósent í þessari svokölluðu heimildarmynd eru kjaftæði“

Ingvi Þór Sæmundsson skrifar
Horace Grant og Michael Jordan unnu þrjá NBA-meistaratitla saman hjá Chicago Bulls. Í dag er grunnt á því góða milli þeirra.
Horace Grant og Michael Jordan unnu þrjá NBA-meistaratitla saman hjá Chicago Bulls. Í dag er grunnt á því góða milli þeirra. vísir/getty

Horace Grant gefur lítið fyrir sannleiksgildi The Last Dance og segir að níutíu prósent af öllu í þáttunum sé kjaftæði.

Grant segir af og frá að hann hafi verið heimildarmaður Sams Smith fyrir bókina The Jordan Ruleseins og Jordan heldur fram í The Last Dance.

„Lygi, lygi, lygi. Ef MJ á eitthvað vantalað við mig útkljáum þetta eins og menn,“ sagði Grant í útvarpsþættinum Kap and Co. á ESPN 1000.

„Hann heldur því fram að ég hafi verið heimildin á bak við bókina. Við Sam erum og höfum alltaf verið mjög góðir vinir. En búningsklefinn er heilagur og ég myndi aldrei leka einhverju persónulegu þaðan. Hann hefur horn í síðu minni. Það sannaðist í þessari svokölluðu heimildarmynd.“

Eftir að hafa leikið með Chicago Bulls sjö fyrstu árin sín í NBA fór Grant til Orlando Magic. Hér reynir hann að stöðva Jordan.vísir/getty

Grant lék með Jordan hjá Chicago Bulls á árunum 1987-93. Þeir urðu þrisvar sinnum NBA-meistarar saman en eru ekki miklir vinir í dag.

„Þættirnir eru skemmtilegir en við sem vorum samherjar hans vitum að níutíu prósent af því sem kemur þar fram er kjaftæði hvað sannleikann varðar,“ sagði Grant.

Í The Last Dance viðurkennir Jordan að hafa verið grimmur við liðsfélaga sína en segist hafa beitt þeim aðferðum til að hjálpa þeim og liðinu. Grant segist alltaf hafa svarað fyrir sig þegar Jordan ibbaði gogg við hann.

„Hann hélt að hann gæti drottnað yfir mér en hafði svo innilega rangt fyrir sér. Ég svaraði honum alltaf fullum hálsi. En það var átakanlegt að horfa á hvernig hann kom fram við Will Purdue, Steve Kerr og unga strákinn Scott Burrell,“ sagði Grant.

Grant varð fjórum sinnum NBA-meistari, þrisvar sinnum með Chicago Bulls og einu sinni með Los Angeles Lakers.vísir/Getty

Hann er ósáttur við þá mynd sem er dregin upp af Scottie Pippen í The Last Dance. Pippen ku einnig vera vonsvikinn vegna þess og hefur ekkert tjáð sig opinberlega síðan þáttaröðin fór í loftið. 

„Ég hef aldrei séð svona frábæran leikmann fá svona meðferð. Það er fjallað um mígrenisleikinn, þegar hann neitaði að koma inn á gegn New York Knicks og Jordan kallaði hann eigingjarnan. Í leik sex í úrslitunum gegn Utah Jazz 1998 var Pippen inni á vellinum þrátt fyrir að geta varla gengið. Hann reyndi að gera allt til að hjálpa liðinu,“ sagði Grant.

Hann segir að The Last Dance sé ekki áreiðanleg heimild og sagan sé einungis sögð frá sjónarhorni Jordans.

„Þegar svokölluð heimildarmynd er bara um einn mann og hann hefur úrslitavald um hvað verður í henni. Þetta er hans útgáfa á því sem gerðist á þessum tíma. Þetta er ekki heimildarmynd því fullt af hlutum voru klipptir út. Þess vegna kalla ég þetta svokallaða heimildarmynd.“

Grant fór til Orlando Magic sumarið 1994 og á sínu fyrsta tímabili hjá liðinu sló það Chicago úr leik í undanúrslitum Austurdeildarinnar. Jordan og félagar náðu fram hefndum tímabilið 1995-96 og hentu Orlando úr leik á leið sinni að fjórða meistaratitlinum.

NBA

Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.