Samfés frestar SamFestingnum um tvo mánuði

Stjórn Samfés, samtaka félagsmiðstöðva og ungmennahúsa á Íslandi, hefur tekið þá ákvörðun um að fresta SamFestingnum 2020 vegna kórónuveirunnar sem veldur sjúkdómnum COVID-19. Þetta kemur fram í tilkynningu frá stjórninni.

SamFestingurinn átti að fara fram 20.-21. mars í Laugardalshöll en nú hefur verið ákveðið að hann fari fram 22.-23. maí.

SamFestingurinn er stærsti unglingaviðburður Íslands þar sem allta að 4.600 ungmenni af öllu landinu koma saman.

„Undirbúningur fyrir viðburðinn hefur staðið yfir í fleiri mánuði og tilhlökkunin mikil. Frestun viðburðar af þessari stærðargráðu þýðir endurskipulag á dagskrá hjá félagsmiðstöðvum á landsvísu.

SamFestingurinn, sem fyrst var haldinn árið 1991, er mikilvægasti viðburðurinn í rekstri samtakanna. Verum ábyrg, stöndum saman og setjum velferð okkar allra í fyrsta sæti.

SamFestingurinn mun fara fram 22.-23. maí í Laugardalshöll. Við hjá Samfés fylgjumst áfram vel með stöðunni og fylgjum leiðbeiningum og tilmælum landlæknis og heilbrigðisyfirvalda,“ segir í tilkynningunni.