Einsöngvarar sungu fyrir Vigdísi og sögur sagðar

Frú Vigdís Finnbogadóttir, forseti Íslands frá 1980 til 1996, fagnar níutíu ára afmæli sínu í dag. Vigdís eins og svo margir eldri borgarar er í sjálfskipuðu sóttkví á tímum kórónuveirunnar en það stoppar ekki landsmenn í að heiðra hana á þessum tímamótum.

Sunna Sæmundsdóttir, fréttamaður okkar, var við hús Vigdísar klukkan þrjú í dag þar sem óformleg dagskrá var Vigdísi til heiðurs. Sýnt var beint á Vísi og í sjónvarpinu á Stöð 2 Vísi. 

Upptöku frá viðburðinum má sjá að neðan.

Hópur íslenskra óperusöngvara söng falleg íslensk lög, þeirra á meðal Lofsöng, og naut Vigdís af pallinum. Höfðu einhverjir áhyggjur af því að Vigdísi yrði kalt. Hún sagðist hafa það fínt svo framarlega sem ekki yrðu sungin öll erindin í þjóðsöngnum og skellti fólk upp úr.

Þá sagðist hún ekki vera orðin of gömul til að tárast yfir fallegum söng.

Ingibjörg Sólrún Gísladóttir, fyrrverandi borgarstjóri, ræddi um áhrifin sem Vigdís hefur haft í kvenréttindabaráttunni. Þá rifjaði Gunnar V. Andrésson ljósmyndari upp skemmtilegar sögur með myndum en hann fylgdi Vigdísi eftir um árabil í starfi sínu.