Smitum fjölgaði um 32 milli daga en 55 náðu bata

Staðfest smit nýs afbrigðis kórónuveiru sem veldur Covid-19-sjúkdómnum eru nú alls 1648 hér á landi. Staðfestum smitum fjölgaði um þrjátíu og tvö frá því að síðustu tölur birtust á covid.is klukkan eitt í gær.

Þá eru 42 nú á sjúkrahúsi og ellefu á gjörgæslu vegna COVID-19. Alls hefur 688 manns batnað af veikinni. Þá eru 3940 manns í sóttkví og 954 í einangrun.14.422 hafa lokið sóttkví. Sýni sem hafa verið tekin eru orðin 32.623 talsins. Sex dauðsföll hafa verið staðfest vegna kórónuveirusmits.

Klukkan tvö verður haldinn upplýsingafundur almannavarna og landlæknis þar sem farið verður yfir stöðu mála í sambandi við faraldurinn og farið yfir aðgerðir til að sporna við útbreiðslu kórónuveirunnar.

Víðir Reynisson yfirlögregluþjónn og Þórólfur Guðnason sóttvarnalæknir munu fara yfir stöðu mála með tilliti til COVID-19 hér á landi. Gestir fundarins verða Páll Matthíasson forstjóri Landspítala og Gylfi Ólafsson, forstjóri Heilbrigðisstofnunar Vestfjarða.