Golf

Elsta risamót golfsins fer ekki fram í ár: Opna breska flautað af

Óskar Ófeigur Jónsson skrifar
Shane Lowry vann opna breska meistaramótið í fyrra og verður nú ríkjandi meistari í tvö ár.
Shane Lowry vann opna breska meistaramótið í fyrra og verður nú ríkjandi meistari í tvö ár. EPA-EFE/FACUNDO ARRIZABALAGA

Opna breska meistaramótið í golfi fer ekki fram á árinu 2020 því það hefur verið flautað af vegna útbreiðslu kórónuveirunnar.

Opna breska er elsta risamótið og átti að fara fram í júlí næstkomandi á Royal St George golfklúbbnum í Kent. Hann mun nú hýsa mótið árið 2021.

„Við könnuðum möguleikana á því að halda „The Open“ seinna á þessu ári en að er ekki mögulegt,“ sagði Martin Slumbers, framkvæmdastjóri R&A.

Opna breska meistaramótið er nú eina risamótið á árinu sem hefur verið flautað af en tveimur af hinum þremur risamótunum hefur bara verið frestað um óákveðinn tíma.

Þetta er í fyrsta sinn sem opna breska meistaramótið fer ekki fram síðan í seinni heimsstyrjöldinni á árunum 1940 til 1945.

Mastersmótið átti að fara fram í apríl og PGA meistaramótið átti að fara fram í maí. Þeim var báðum frestað. Fjórða risamótið, opna bandaríska mótið er enn sett á upphaflegan tíma sem er frá 18. til 21. júní.

149. opna breska meistaramótið fer því fram 2021 en ekki 2020 sem um leið þýðir að 150. meistaramótið fer nú fram á St. Andrews vellinum sumarið 2022. Opna breska meistaramótið fór fyrst fram árið 1860 og er því elsta risamótið í golfi.




Fleiri fréttir

Sjá meira


×